Во „Театар комедија“ се одигра претставата „Анатомија на неверството“, во режија на Александра Кардалевска. Низ неколку посебни едночинки, во кои истите актери толкуваат различни карактери, претставата зборува за неверството, бракот и воопшто за машко-женските љубовни односи.
– Ликовите во сите едночинки се поставени во парадоксални ситуации, а самото сиже, спојувајќи две противречни состојби, претставува оксиморон, кој го изразува самото неверство како болно задоволство, односно пријатна сензација што создава проблеми. На тој начин претставата игра по тенката линија на сарказмот и апсурдот, создавајќи истовремено хумористични и драматични ситуации – вели Кардалевска.
Автор е Валентин Красногоров, драматург Дарко Јан Спасов, а костимографка Ивана Каранфиловска. Играат Жаклина Петровска и Тони Денковски.
