Украинскиот претседател Володимир Зеленски изјави дека оштетениот нафтовод „Дружба“ ќе биде делумно повторно ставен во функција до крајот на април, при што нагласи дека е постигнат компромис, но не и целосна санација.
На заедничката прес-конференција во Берлин со германскиот канцелар Фридрих Мерц, Зеленски истакна дека Украина се обврзала на итна поправка за да се овозможи проток на нафта, но дека системот нема да биде целосно обновен, пренесе „Политико“.
Тој изрази очекување дека Унгарија ќе ја повлече блокадата на заемот од 90 милијарди евра наменет за финансирање на украинската одбрана, поврзувајќи го тоа со напредокот околу нафтоводот и тековните договори во рамките на Европска унија.
Нафтоводот „Дружба“, кој пренесува руска нафта преку Украина кон Унгарија и Словачка, беше оштетен во јануари по напад со беспилотно летало, што предизвика политички тензии меѓу Киев и Будимпешта.
Во меѓувреме, новоизбраниот унгарски премиер Петер Маѓар сигнализираше подготвеност за деблокирање на заемот, што кај европските лидери создаде очекувања за брзо решавање на спорот.
Германскиот канцелар Мерц истакна дека финансиската помош за Украина мора итно да биде исплатена, нагласувајќи дека земјата има потреба од брза и стабилна поддршка во услови на војната со Русија.
Средбата во Берлин беше прва заедничка владина консултација меѓу Германија и Украина по повеќе од 20 години, при што беа потпишани договори за соработка, меѓу кои и за развој на нови одбранбени системи и намалување на зависноста од американски испораки.
