Турските власти спроведоа координирани рации против ЛГБТК+ организации, активисти и места за кои се сомневаат дека се поврзани со нив, при што кривична постапка е покрената против 162 лица. Во операциите, кои се спроведуваат во рамки на акцијата наречена „Моето семејство е безбедно“, досега се приведени најмалку 47 лица, според извештаите на турските власти и меѓународните медиуми.
Операциите биле спроведени во 15 турски провинции, меѓу кои Истанбул, Анкара и Измир. Според турскиот министер за правда Акин Ѓурлек, постапката опфаќа 162 осомничени, девет здруженија и 13 компании. Во Истанбул, обвинителството соопшти дека 26 лица биле приведени во рамки на операција против 38 осомничени, додека во одвоена истрага во Анкара биле приведени уште 21 лице.
Полицијата извршила претреси во домови, канцеларии, здруженија и други објекти. Во Истанбул биле претресени и неколку локали, вклучително и геј-бар и ноќен клуб кој важи за место за собирање на ЛГБТК+ заедницата, како и турска бања за мажи. Според властите, при претресите биле запленети наркотични средства, дигитална опрема, шверцуван алкохол и огнено оружје.
Турските обвинители тврдат дека истрагите се однесуваат на сомневања за посредување во проституција и обезбедување простории за такви активности, производство или дистрибуција на недозволени содржини, како и активности за кои властите велат дека можеле да влијаат врз малолетници во однос на сексуалната ориентација и родовиот идентитет. Властите велат дека операцијата е преземена со цел заштита на децата, семејството и општествениот поредок.
Акцијата е дел од пошироката политика на турскиот претседател Реџеп Таип Ердоган, кој периодот од 2026 до 2035 година го прогласи за „Деценија на семејството и населението“. Владата ја поврзува политиката со заштитата на семејните вредности и со настојувањата за зголемување на наталитетот во земјата.
Организацијата „Каос ГЛ“, која работи на заштита на правата на ЛГБТК+ лицата, соопшти дека полицијата извршила претрес во нејзините канцеларии и дека биле приведени членови на нејзиниот управен одбор. Организацијата наведе и дека повеќе активисти биле приведени во рации извршени во нивните домови.
Според „Каос ГЛ“ и организациите за човекови права, властите истовремено блокирале пристап до повеќе веб-страници и профили на социјалните мрежи поврзани со ЛГБТК+ организации, активисти и бранители на човековите права. Здружението за слобода на изразување во Истанбул претходно извести дека профили на социјалните мрежи на повеќе организации биле блокирани.
Рациите предизвикаа критики од организации за човекови права и европски претставници. Критичарите ја оценија операцијата како ескалација на притисокот врз ЛГБТК+ заедницата и граѓанското општество во Турција, додека властите инсистираат дека постапките се поврзани со заштита на децата и семејството, а не со сексуалната ориентација на лицата.
