АФРИКА: ФОРМИРАНА Е АЛИЈАНСА НА САХЕЛСКИТЕ ДРЖАВИ
Мали, Буркина Фасо и Нигер потпишаа меѓусебен одбранбен пакт, бидејќи трите земји од Сахел имаат цел да си помагаат против можни закани од оружен бунт или надворешна агресија. Повелбата, позната како Алијанса на сахелските држави, ги обврзува потписниците да си помагаат меѓусебно, вклучувајќи и воено, во случај на напад врз некоја од нив.
Договорот исто така ги обврзува трите земји да работат на спречување или задушување оружени бунтови.
– Овој сојуз ќе биде комбинација од воените и економските напори на трите земји. Наш приоритет е борбата против тероризмот во трите земји – изјави министерот за одбрана на Мали, Абдулаје Диоп.
Регионот Липтако-Гурма, каде што се спојуваат границите на Мали, Буркина Фасо и Нигер, беше опустошен од оружени бунтови во последниве години. Оружениот бунт што избувна во северниот дел на Мали во 2012 година се прошири во Нигер и Буркина Фасо во 2015 година.
Сите три земји беа членки на заедничките сили на Алијансата Г5 Сахел, поддржана од Франција со Чад и Мавританија, која беше лансирана во 2017 година за да се справи со вооружените групи поврзани со Ал каеда и групите ИСИЛ (ИСИС). Од 2020 година тие беа предмет на пуч, последно во Нигер, каде што војската го собори претседателот Мохамед Базум во јули. Генералите што ја презедоа власта во Нигер им рекоа на француските војници дека мора да ја напуштат земјата.
Западноафриканскиот регионален блок ЕКОВАС се закани со воена интервенција во Нигер поради државниот удар, но регионалниот блок ја ублажи својата воинствена реторика во последниве недели. Мали и Буркина Фасо брзо одговорија, велејќи дека секоја таква операција ќе се смета за „објавување војна“ против нив. Франција беше принудена да ги повлече своите војници од Мали и Буркина Фасо и е во тензичен конфликт со армијата, која ја презеде власта во Нигер.
