Во Техеран се разгледува меморандум за разбирање со САД за ставање крај на војната
- Предлогот што е написмено форматиран предвидува прогласување крај на двомесечната војна што ја почнаа САД и Израел на 28 февруари, а исто така би создал рамка за подетални преговори во рок од 30 дена. Одговорот на Иран се очекуваше во рок од 48 часа, но беше
истакнато дека е можна и промена на условите утврдени во рамката за време на преговорите кон конечен договор. За меморандумот се
дискутира преку директни и индиректни преговори предводени од претставниците на Трамп, Џаред Кушнер и Стив Виткоф - Американските претставници наводно веруваат дека иранските лидери имаат поделени мислења за предлозите, што го отежнува постигнувањето договор, според извори на медиумите во САД, додека се смета дека администрацијата на американскиот претседател Трамп е заинтересирана да избегне дополнително одолжување на непопуларната војна
САД и Иран се најблиску до постигнување договор за прекин на војната, како што сугерираат американски претставници, темелејќи го оптимизмот врз меморандумот за разбирање (МОУ) од една страница и 14 точки што иранските власти моментално го разгледуваат, пренесуваат американските медиуми. Документот предвидува прогласување крај на двомесечната војна што ја почнаа САД и Израел на 28 февруари, а исто така би создал рамка за подетални преговори во рок од 30 дена. Одговорот на Иран се очекуваше во рок од 48 часа, но беше истакнато дека е можна и промена на условите утврдени во рамката за време на преговорите кон конечен договор. За меморандумот се дискутира преку директни и индиректни преговори предводени од претставниците на Трамп, Џаред Кушнер и Стив Виткоф.
Според предложената рамка утврдена со МОУ, Иран би ги укинал ограничувањата за транзит низ Ормускиот Теснец што се во сила од почетокот на март, задушувајќи ги глобалните енергетски текови и превозот. Во исто време, САД ќе ја укинат својата поморска блокада на иранските пристаништа, која беше воведена на 13 април и блокираше клучен извор на приходи за земјата. Клучните услови на рамката, исто така, наводно вклучуваат мораториум за иранско нуклеарно збогатување, укинување на американските санкции врз Иран и ослободување на милијарди долари ирански средства кои се замрзнати низ целиот свет.
Продолжуваат тензиите во Ормускиот Теснец
Тековната поморска блокада на Ормускиот Теснец од страна на САД, во рамките на која Американците бараа Иран да биде отворен за сите транзитни премини, а не само за бродови што ќе добијат негова дозвола, ги зголеми тензиите меѓу двете страни.
Американските сили во меѓувреме извршија напади врз ирански воени објекти што се сметаат за одговорни за напади врз воени бродови што транзитираат низ Ормускиот Теснец, според Централната команда на САД. Американската армија соопшти дека американските сили „не бараат ескалација“. Портпарол на вооружените сили на Иран изјави дека воздушните напади погодиле цивилни области.
Иранската нуклеарна програма е клучна точка во преговорите
Иранската нуклеарна програма, која САД и Израел ја наведоа како оправдување за започнување на војната, исто така се смета за значителна пречка во преговорите. САД и Иран беа среде обновените нуклеарни преговори кога САД и Израел започнаа напади врз Иран на 28 февруари, обвинувајќи ги иранските преговарачи за непопустливост. Иран претходно изјави дека нападите на САД ја еродирале секоја доверба што би можела да доведе до нуклеарен договор.
Како дел од Меморандумот за разбирање, Иран ќе мора да се обврзе никогаш да не се стреми кон нуклеарно оружје, за кое земјата веќе тврди дека никогаш не се обидела да го развие. Деталите за какви било гаранции, вклучително и евентуален мораториум за збогатување ураниум од страна на Иран, сè уште се разработуваат, објави американскиот портал „Аксиос“. Официјалните лица сугерираа дека мораториумот ќе трае најмалку 12 години, што би било компромис помеѓу претходниот предлог на Иран за петгодишен мораториум и предлогот на САД од 20 години. По мораториумот, Иран може да го збогати својот ураниум на ниско ниво од 3,67 отсто.
Официјалните претставници на претседателската администрација на Трамп наводно сакаат да вклучат и одредба дека секое прекршување на збогатувањето ќе го продолжи мораториумот. Други можни клаузули наводно вклучуваат ирански обврски да не работи со подземни нуклеарни постројки, како и засилени инспекции, вклучително и предвремени инспекции од страна на Обединетите нации. САД, исто така, побараа Иран да го отстрани својот високозбогатен ураниум, евентуално предавајќи им го на САД.
Извори на американските медиуми: Администрацијата на Трамп не сака одолжување на војната, Иранците со поделени ставови за предлозите во меморандумот
Американските претставници наводно веруваат дека иранските лидери имаат поделени мислења за предлозите, што го отежнува постигнувањето договор, според извори на медиумите во САД. Администрацијата на Трамп претходно изјави дека првата рунда разговори пропаднала бидејќи иранскиот тим морал да се врати во Техеран за да добие одобрение за потпишување договор.
Државниот секретар на САД, Марко Рубио, претходно го објави крајот на офанзивната фаза на американската воена операција против Иран, наречена „Операција епски бес“, како и дека САД се префрлаат на „одбранбена“ позиција.
– Ова е многу сложено и техничко прашање. Но, мора да имаме дипломатско решение што е многу јасно за темите за кои се подготвени да преговараат и обемот на отстапките што се подготвени да ги направат на почетокот за да биде вредно – порача Рубио.
Од друга страна, претседателот Трамп предупреди дека ако Иран наскоро не потпише договор, „САД ќе го нокаутираат многу посилно и многу понасилно“. Но, наспроти ваквата изјава, се верува дека администрацијата на Трамп е заинтересирана да избегне дополнително одолжување на непопуларната војна. Р.С.
