ДЕНЕСКА РЕВАНШ СО УКРАИНА ЗА ПЛАСМАН НА РАКОМЕТНИОТ МУНДИЈАЛ ГОДИНАВА
Македонската женска ракометна репрезентација денеска на неутрален терен во унгарскиот град Кишварда (од 17 часот) треба да го одигра реванш-дуелот со Украина, за пласман на Светското првенство (СП), во декември, во Норвешка, Данска и во Шведска. Македонките ќе се обидат да ја анулираат негативата од два гола, по поразот во Скопје (22-24), во саботата. Двата гола, сепак, се надоместлива разлика.
– Се надевам дека на реваншот ќе бидеме подобри, оти разликата во квалитетот не е голема. Во вториот дел во Скопје одигравме подобро. Ако се поправиме, можеме позитивно да изненадиме во вториот меч – вели селекторот Љубомир Савевски.
Македонија досега пет пати настапи на СП, последен пат во 2007 година (12-то место), а најдобриот пласман го оствари во 1997 година, на седмото место. Украина седум пати досега била дел од мундијалите, најдобриот пласман ѝ е четвртото место во 2003 година, а последен пат настапи пред 14 години и ја освои 17-та позиција. Г.И.
