Соларните паркиралишта за автомобили овозможуваат производство на електрична енергија на отворени простори што имаат тенденција да бидат погодно позиционирани во близината на објекти што трошат енергија, како што се болници, трговски центри или деловни објекти
Со зголемена искористеност на обновливите извори до пониски трошоци за струја
Надвор од канцелариите на еден голем производител на автомобили на југот на Англија сега има поставено вкупно повеќе од 2.000 соларни панели на паркингот, со максимален капацитет од нешто помалку од еден мегават, што е доволно за напојување стотици дома со електрична енергија.
Соларните паркиралишта за автомобили овозможуваат производство на електрична енергија на отворени простори што имаат тенденција да бидат погодно позиционирани во близината на објекти што трошат енергија, како што се болници, трговски центри или деловни објекти. Стреите имаат дополнителни придобивки со тоа што ги штитат автомобилите од дожд и снег или од жешкото сонце во лето.
Во обид да се зајакне производството на чиста енергија, францускиот Сенат неодамна одобри закон со кој е задолжително сите постојни и нови паркинзи со 80 или повеќе места да бидат покриени со соларни панели. Иако не постои еквивалентен услов во Велика Британија, соларните паркиралишта постојат со години и има знаци дека тие сега почнуваат повеќе да се користат. Со оглед на тоа што цените на електричната енергија моментално сè уште се покачени, многу бизниси се свртуваат кон обновливите извори на енергија на терен за да се обидат да ги намалат трошоците на долг рок.
Постои огромна можност повеќе британски паркинзи да се претворат во соларни фарми, се наведува во новиот извештај објавен од добротворната организација ЦПРЕ и институтот за енергија „Ју-си-ел“. Велика Британија во моментов има вкупно околу 15 гигавати соларен капацитет и бара 40 гигавати до 2030 година за да ги исполни целите за нето нула штетни емисии, според „Солар енерџи ју-кеј“. Извештајот на ЦПРЕ и „Ју-си-ел“ претпоставува дека 50 отсто од секој поединечен паркинг може да биде покриен со соларни панели.
Голем интерес за соларни инсталации
Како и да е, на паркинзите има многу простор за да се покријат со соларни панели и луѓето почнуваат сега да го сфаќаат тоа. Така, разни конкурентски компании порачаа дека има голема побарувачка за соларни стреи за паркиралишта.
„Праксија енерџи“ со седиште во Шпанија испорачува околу три мегавати соларни инсталации за паркирање во Велика Британија секоја година и вели дека очекува тоа да се зголеми десеткратно до 2028 година. Портпаролката на „Веолија“ вели дека компанијата неодамна инсталирала систем за соларна стреа од 1,1 мегават на паркингот на болницата во Истборн и дека фирмата во последно време регистрирала зголемена побарувачка за соларна инфраструктура во Велика Британија. „Соларсенс“, компанија во Кливдон, исто така вели дека добила зголемени барања во последниве месеци.
Сепак, веќе постојат некои водечки примери. Најголемиот соларен паркинг инсталиран до денес во Велика Британија е оној во фабриката за автомобили на „Бентли“ во Кру, кој има максимален капацитет на моќност од 2,7 мегавати.
Станици за полнење електрични возила
Соларните панели на паркинзите исто така можат да го напојуваат полнењето на електричните возила. Ова особено добро функционира во деловните простории, каде што автомобилите на вработените се паркирани надвор многу долго. Трговските центри, фудбалските стадиони, центрите за рекреација и кината се исто така погодни места, бидејќи автомобилите обично се паркираат два часа или повеќе за да се овозможи доволно полнење. Но, челичните потпори потребни за многу соларни стреи ја зголемуваат цената. Често е поевтино едноставно да се стават соларни панели на покривот на големите згради, како што се супермаркетите.
Можни предизвици
Еден проблем со кој се соочуваат многу проекти за обновлива енергија во моментот е недостигот од приклучоци на мрежата, бидејќи вишокот на енергија генериран од соларни панели, на пример, мора да биде спроведен во неа. Инсталации за обновливи извори на енергија во вредност од милијарди фунти се ефективно на листата на чекање поради ова прашање, според истражувањето на „Би-би-си“.
Портпаролот на „Солар енерџи ју-кеј“ исто така го истакнува овој проблем, велејќи дека соларните паркиралишта ќе останат „далечна перспектива“ додека не се реши овој проблем. Регулаторот на енергетската индустрија „Офгем“ бара начини да го забрза процесот, а фирмата за дистрибуција исто така има план за негово подобрување.
– Има многу други локации низ Велика Британија, покрај паркинзите, кои исто така би можеле да сместат соларни инсталации и да помогнат да се отфрли употребата на фосилните горива – забележува професорката Сара Вокер од Универзитетот во Њукасл.
На пример, велосипедски патеки и железници или резервоари можат да бидат покриени со преносни соларни панели. Тие исто така помагаат да се намали загубата на вода од испарувањето во резервоарите.
