Животни
Без разлика дали тоа е вашето домашно милениче или куче што дреме во парк, будењето на кучињата што спијат всушност може да предизвика сериозни проблеми, велат ветеринарите. Можеби сте мислеле дека кучињата многу дремат и спијат, но како што објаснува Катрин Џорџ, експерт за благосостојба на животните, ним им треба многу сон, бидејќи тоа им помага да го обноват нивниот имунитет и да ги поправат оштетените клетки во телото.
Според американскиот кинолошки клуб (AKC), во просек, кучињата поминуваат околу половина од денот во спиење, а само 20 проценти од денот се активни. Тие бројки варираат кога станува збор за кученца, постари кучиња и големи раси, пренесува „Бестлајф“. Кучињата имаат слични циклуси на спиење како и луѓето, па затоа влегуваат и во РЕМ-фазата, која се смета за најдлабок циклус на спиење, а наедно е и фаза во која сонуваат.
– Кога ќе заспијат, на кучињата им требаат околу 10 минути за да преминат од бавниот бран, за време на кој дишењето се забавува, крвниот притисок се намалува и отчукувањата на срцето се забавуваат, во РЕМ. Во РЕМ-фазата нивните очи се тркалаат под затворените капаци и нивното тело може да реагира на соништата – објаснуваат од АКЦ.
Според Џорџ, во таа фаза кучињата може да ги грчат нозете, опашката или ушите. Бидејќи се во толку длабок сон, никогаш не треба да ги изненадувате или будите бидејќи може да се дезориентираат, да скокнат, да гребат или дури и да гризат. Ветеринарот Мондријан Контрерас исто така наведува дека има и други причини зошто никогаш не треба да будите куче што спие.
– Исто така постојат медицински состојби, како што се губење на слухот, артритис и повреди на грбот, кои можат да предизвикаат кучињата да бидат пореактивни ако ненадејно се разбудат. Оваа интензивна реакција може да предизвика тие да се повредат или ненадејната зголемена физичка непријатност може да ги натера инстинктивно да ’ржат – вели тој.
Ако навистина треба да го разбудите кучето, стручњаците советуваат да го изговорите неговото име тивко, за да не го исплашите, или може да му ставите нешто вкусно пред носот за да го направите будењето попозитивно искуство.
