ТЕНИС
- Тенисот е во силна позиција денес. Нашите настани продолжуваат да растат, гледачите се ангажираат во спортот на повеќе начини од кога било досега, а заработката на играчите достигна рекордни нивоа. Имаме одговорност да ја зајакнеме конкуренцијата, подобро да ги усогласиме стимулациите и да ја прошириме поддршката на повеќе играчи, помагајќи им да се справат со трошоците за натпреварување на турнејата, вели претседателот на АТП, Андреа Гауденци
Асоцијацијата на тениските професионалци (АТП) ги изложи плановите за значително зголемување на својот бонус-фонд и да ги преобликува својата ранг-листа и календарот од 2028 година според пакетот за кој се предвидува зголемување на надоместоците на играчите на 350 милиони долари, а наедно се обидува да ги ублажи растечките загрижености околу обемот на работа на играчите, пишува агенцијата „Ројтерс“. Според предлозите презентирани од претседателот на АТП, Андреа Гауденци, фондот за бонуси на машката турнеја би се зголемил од 21,5 милион долари на 50 милиони долари, со уште 25 милиони долари за играчите меѓу првите 250 на крајот од годината и 30 милиони долари годишно за пензии што покриваат 300 играчи.
– Тенисот е во силна позиција денес. Нашите настани продолжуваат да растат, гледачите се ангажираат во спортот на повеќе начини од кога било досега, а заработката на играчите достигна рекордни нивоа. За да остане силен, спортот мора да продолжи да се развива. Имаме одговорност да ја зајакнеме конкуренцијата, подобро да ги усогласиме стимулациите и да ја прошириме поддршката на повеќе играчи, помагајќи им да се справат со трошоците за натпреварување на турнејата – напиша Гауденци во отворено писмо, пренесе „Ројтерс“.
Во зависност од понатамошни консултации и одобрување, централната компензација на играчите на АТП ќе надмине 100 милиони долари од 2028 година, при што наградните пари и распределбата на профитот ќе ја зголемат вкупната компензација на тенисерите на проектирани 350 милиони долари пред да се земат предвид сите награди од гранслем-турнирите. АТП, исто така, планира да им даде на резултатите на своите најголеми настани поголема тежина на рангирањето, додека создава недели посветени на турнирски категории за појасна структура.
АТП соопшти дека ќе ја преиспита долгорочната структура на своите формати на натпревари, вклучувајќи ги и потенцијалните промени во натпреварите во двојки, при што се очекува сите пренаменети награди да одат кон квалификациски мечеви во поединечна конкуренција и исплати во раните рунди, пишува „Ројтерс“. Гауденци додаде дека АТП ќе продолжи да ги развива предлозите со своите советодавни совети и одбор на играчи и турнири, за да донесе конечен пакет на своите состаноци на крајот од годината во Торино. Н.М.
