Недостиг од 7.813,49 килограми сув цвет од медицински канабис е утврден при контрола во компанија за одгледување медицински канабис во селото Борисово, општина Ново Село. По утврдените неправилности, СВР Струмица поднесе кривични пријави против правното лице и неговиот управител, соопшти Министерството за внатрешни работи (МВР).
Контролата ја извршиле полициски службеници од СВР Струмица, заедно со претставници на надлежната комисија при Министерството за здравство, во просториите каде што бил складиран сувиот цвет од медицински канабис.
При проверката биле констатирани повеќе неправилности, меѓу кои недостиг од документација за ангажираниот кадар и друга задолжителна документација. Дополнително, утврдено е дека за речиси осумте тони сув цвет од медицински канабис не постојат соодветни документи, ниту докази за неговото потекло и располагање.
Кривичните пријави се поднесени против правното лице од Борисово и В.К. од Ново Село, кој престојува во Струмица и е управител на компанијата. Тие се пријавени поради сомнение за сторени кривични дела согласно Законот за контрола на опојни дроги и психотропни супстанции.
Од МВР информираат дека случајот бил откриен при контролата на складираните количини и придружната документација, при што биле утврдени несогласувања во евиденцијата и недостиг на докази за потеклото и располагањето со производот.
