Излезноста на гласачите до 18.30 часот е 48, 46 отсто, објави Александар Даштевски, претседател на Државната изборна комисија (ДИК) на прес-конференција по затворањето на гласачките места во 19 часот за првиот круг од седмите претседателски избори во Северна Македонија.
До завршувањето на гласањето до 19 часот, до Државната изборна комисија (ДИК) се пристигнати податоци за излезност 3.174 изборни места. Од вкупно запишани 1.653.023 избирачи, на овие избирачки места гласале 801.074 граѓани, што е 48, 46 отсто, рече Даштевски.
Најголема излезност има во Новаци, 71,07 отсто, а најмала во Центар Жупа од 16,90 отсто.
Даштевски оцени дека гласањето беше мирно и без поголеми инциденти на гласачките места.
ДИК усвоила 134 приговори од граѓани. На бесплатната телефонска линија се јавиле 10 граѓани, а преку видео повик на телефонската линија информации побарале осум лица со оштетен слух.
Гласањето ќе се продолжи на по едно избирачко место во Демир Хисар, Липково, Делчево и Могила, затоа што гласањето било прекинато повеќе од еден час.
Според македонскиот изборен систем, претседателот на Републиката се избира на општи и непосредни избори, со тајно гласање за мандат од пет години, со право на најмногу два мандати.
Ова се седми непосредни избори за претседател од независноста на државата. Претходните беа одржани во 1994, 1999, 2004, 2009, 2014 и во 2019 година.
