Британскиот премиер Борис Џонсон ги обвини антиваксерите дека зборуваат глупости кога се во прашање вакцините против ковид-19.
Тој рече дека оние кои шират погрешни информации на социјалните мрежи „во потполност грешат“ и дека е време да им се посвети внимание, пренесе „Би-би-си“.
– Сакам да им порачам на антиваксерите, на луѓето кои пишуваат глупости на социјалните мрежи – целосно грешат. Досега не сте ме слушнале да го кажам ова, бидејќи мислам дека е важно да имаме доброволен пристап во оваа земја и тоа ќе го одржиме – рече Џонсон, алудирајќи дека Британија нема да воведе задолжителна вакцинација.
Тој посочи дека некои негови европски колеги се одлучуваат за „принудни“ решенија.
– Антиваксерите целосно грешат и време е владата да им посвети внимание поради тоа што го прават. Апсолутно е погрешно, контрапродуктивно, сè што ставаат на социјалните мрежи е глупост – изјави Џонсон.
Тој откри дека околу 30 до 40 проценти од 17.000 пациенти во британските болници не биле вакцинирани со ниедна доза.
– Овој број се зголемува кога станува збор за интензивна нега – посочи премиерот.
Во болниците во Лондон се распоредени припадници на британските вооружени сили за да помогнат во услови на зголемување на бројот на пациенти со ковид-19, бидејќи поради омикрон сојот, голем број вработени се болни и не можат да работат.
Од 200 распоредени воени лица, 40 се лекари кои ќе му помогнат на персоналот на Националната здравствена служба (НХС) да се грижи за пациентите, пишува британскиот весник „Гардијан“.
Францускиот претседател Емануел Макрон, пак, неодамна изјави дека сака да ги изнервира Французите кои не се вакцинирани против ковид-19 и што е можно повеќе да го ограничи нивниот пристап до општествениот живот.
– Сакам да ги нервирам невакцинираните. Ќе продолжиме да го правиме тоа до крај – рече Макрон за весникот „Ле Паризиен”, отфрлајќи ја можноста за воведување нови мерки за борба против ковид-19.
