Како засилување на силите што го гаснат пожарот од земја, во општина Неготино, еден армиски хеликоптер започна со дејство врз огнените јазици на планината Серта. Полицискиот хеликоптер се подготвува да полета, а и двата „ер трактори“ ќе полетаат кон Серта во 10 часот – информираат утрово од Центарот за управување со кризи (ЦУК).
Кризниот штаб на Општина Неготино синоќа излезе со препораки до домаќинствата во селата и во градот, задолжително да прават расчистување на тревните површини околу своите дворови, имотите и останатите подрачја.
– Апелираме до месното население за поголема ажурност, следење на упатствата и насоките од страна на МВР, да нема поголеми движења кон критичните места. Исто така, побарана е повторно до ЦУК и до ДЗС воздухопловна подршка за утрешниот ден, за да би можело да се изврши побрзо локализирање на пожарите – информираа синоќа од Штабот за заштита и спасување при локалната самоуправа.
Ова општинско тело, формирано откако избувна големиот пожар, синоќа одржа состанок, а членовите на штабот биле запознати со состојбите на терен од страна на претставници на ЦУК, ДЗС, МВР.
Пожарот на неготинска територија избувна во средата околу 10.30 часот.
