Горивата од полноќ ќе се продаваат по повисоки цени, откако Регулаторната комисија за енергетика (РКЕ) донесе одлука за нова корекција на малопродажните цени на нафтените деривати.
Според одлуката, бензините поскапуваат за 1,5 до 2 денари по литар, додека дизел-горивото ќе биде поскапо за половина денар. Од друга страна, поевтинуваат екстра лесното масло за домаќинство и мазутот.
Цената на бензинот ЕУРОСУПЕР БС-95 се зголемува за 1,50 денари и од полноќ ќе изнесува 87,50 денари за литар.
ЕУРОСУПЕР БС-98 поскапува за два денари, па новата цена ќе биде 90 денари за литар.
Дизел-горивото ќе се продава по цена од 87,50 денари за литар, што претставува зголемување од 0,50 денари.
Во исто време, екстра лесното масло за домаќинство поевтинува за 2,50 денари по литар и ќе чини 86,50 денари.
Намалување има и кај мазутот, чија цена се намалува за 1,074 денари за килограм. Новата цена ќе изнесува 46,223 денари за килограм.
Новите цени стапуваат во сила од полноќ.
