Министерството за здравство презема активности за што поскоро обезбедување на вакцините против сезонски грип, со цел вакцинацијата на ранливите категории граѓани да започне според планираното.
Од Министерството информираат дека проблемот е глобален и е поврзан со производството на вакцините, откако годинава биле променети сите три вирусни соеви што се содржат во вакцината – два соја на грип А и еден на грип Б.
Поради промените во составот, Светската здравствена организација и американската Агенција за храна и лекови (ФДА) ги ажурирале сите три соеви, што довело до одложување на почетокот на производството кај производителите ширум светот.
– На објавениот тендер за набавка не пристигна ниту една понуда. Причината е проблем во производството на глобално ниво, а не во нашата постапка – велат од Министерството за здравство.
Оттаму посочуваат дека се во постојана комуникација со земјите од регионот и пошироко и очекуваат во текот на овој месец да бидат обезбедени вакцините преку меѓународни канали.
Од Министерството потсетуваат дека вакцинацијата останува една од најефикасните мерки за заштита од тешки форми на грип и компликации, особено кај хронично болните, повозрасните лица и бремените жени.
– За секој напредок граѓаните ќе бидат навремено информирани – соопштуваат од Министерството за здравство.
