Индонезиската влада објави дека две женки суматрански носорози се бремени, што е добра вест за опстанокот на овие животни, едни од најретките и најзагрозени видови цицачи. Рату, женка носорог од националниот парк Веј Камбас на островот Суматра, е бремена 238 дена, речиси на половина од бременоста, со своето четврто младенче. Ќерката на Рату, Делила, е бремена 250 дена со своето второ младенче. Се очекува мајката и ќерката да ги родат своите млади во мај.
Во дивината останаа помалку од 80 суматрански носорози, а Меѓународната унија за зачувување на природата го класифицира видот како критично загрозен.
– Бременоста на овие две женски суматрански носорози е добра вест не само за Индонезија туку и за целиот свет – рече во неделата Ахмад Мунавир, службеник на индонезиското Министерство за шумарство.
Тој додаде дека овие напори се дел од долгорочен план за зачувување на видот, „со планирана програма за размножување, управување со репродуктивното здравје и интензивно следење на секое животно“. Министерството објави дека здравјето и безбедноста на женките внимателно ги следат медицинскиот тим, чуварите и властите на националните паркови.
– Ова соопштение означува значаен чекор во борбата за спасување на овој загрозен вид – изјави Нина Фасионе, извршен директор на Меѓународната фондација за носорози.
Овие животни живеат само во Индонезија, расфрлани во националните паркови во Северна Суматра, Лампунг, Бенгкулу и Источен Калимантан.
