Саудиска Арабија соопшти дека, во координација со Централната команда на САД (CENTCOM), извршила целни воздушни напади врз милитантни групи поддржани од Иран во Ирак.
Според саудиските власти, операцијата била одговор на неодамнешните напади со беспилотни летала врз саудиски нафтени постројки, за кои Ријад ги обвинува проиранските милиции.
И американската војска потврди дека, заедно со саудиските вооружени сили, биле нападнати цели поврзани со ирачки милиции кои имаат врски со иранскиот Корпус на Исламската револуционерна гарда (ИРГЦ).
Претходно, саудиската противвоздушна одбрана соопшти дека пресретнала и уништила неколку беспилотни летала лансирани од, како што наведува, „терористички групи поддржани од Иран“.
– Саудиска Арабија го задржува легитимното право да ја брани својата територија и националните интереси, како и правото да одговори во соодветно време и на соодветно место – објави на платформата „Икс“ портпаролот на саудиското Министерство за одбрана, Турки ал Малики.
Нападите претставуваат нова ескалација на тензиите во регионот, каде во последниот период се зачестени нападите со дронови и ракетните напади поврзани со проирански вооружени групи.
