Членовите на Комитетот за надворешни работи на Европскиот парламент (АФЕТ) денеска треба да се изјасни по Извештајот за Стратегијата за проширување на ЕУ на литванскиот либерален европратеник Петрас Ауштревичиус.
Овој Извештај дава оценка на соодветноста и релевантноста на моменталната политичка позиција на ЕУ за проширувањето и методологијата што ја применува Комисијата, проценувајќи го целокупниот напредок во подготовките за пристапување и преговорите за да се поттикнат неповратните реформи.
Во продолжение членовите на АФЕТ ќе имаат размена на мислења со кипарскиот министер за надворешни работи Константинос Комбос и со кипарската заменичка-министерка за европски прашања Марилена Рауна за приоритетите на кипарското претседателство со Советот на Европската Унија.
Во попладневното продоложение на седницата на членовите на АФЕТ ќе им се приклучат нивните колеги од Комитетот за развој (ДЕВЕ) на дебатата „Воспоставување на глобална Европа“ заедно со еврокомесарите за Медитеранот, Дубравка Шуица, за проширување Марта Кос, за меѓународни партнерства Јозеф Сикела и за еднаквост, подготвеност и справување со кризи Хаџа Лахиб.
По ова европратениците од двата комитети ќе имаат размена на мислења со амбасадорот на САД при ЕУ, Ендрју Пуздер.
Се очекува дебатата да се фокусира на иднината на трансатлантските односи во контекст на променливото глобално опкружување и во услови на зголемени геополитички тензии, вклучувајќи ја и руската агресија врз Украина, растечката глобална конкуренција и новите пристапи кон економската и безбедносната политика. Дебатата ќе им даде можност на европратениците да разговараат и за актуелната состојба во односите меѓу ЕУ и САД и за перспективите за нивни иден развој.
