Прва книга за деца на авторката Марија Трифуновска Тасеска
Неодамна од печат излезе новата сликовница „Мравката Данка Спанка го спасува Божиќ“ на авторката Марија Трифуновска Тасеска. Станува збор за топла и поучна приказна, која кај најмалите буди не само насмевки туку и мисли за создавање подобар свет.
– Навидум мравката Данка Спанка е мрзлива и одбегнува работа, што е спротивно на карактеристиките на мравките. Но токму таа нејзина мана, другите ја прифаќаат без осудување. Така, љубовта и заедништвото ги поттикнуваат нејзината преобразба и нејзиниот развој кога доаѓа момент да ја жртвува својата удобност за доброто на другите – вели авторката Трифуновска Тасеска.
Сликовницата беше промовирана во Универзитетската библиотека „Климент Охридски“ во Битола, пред многубројна детска публика, која ја исполни салата со џагор и смеа. Присутните деца изработија исто таков шал каков што мравките ѝ подаруваат на Данка Спанка во сликовницата, во знак на љубов, внимание и почит кон различностите.
Писателот Михајло Свидерски, во рецензијата за сликовницата потенцира дека авторката пишува со лирска мекост, ставајќи ја добрината во центарот на вниманието.
– Сцените на радост, заедништво и благодарност внесуваат атмосфера на топлина и сплотеност, со што сликовницата станува вистинска празнична читанка. Финалната порака за прифаќање, почитување и за искрено другарство, која Данка ја изразува како своја божиќна желба, ја заокружува приказната со мудрост што е вредна да се понесе низ животот – подвлекува Свидерски.
Марија Трифуновска Тасеска дипломирала на Филолошкиот факултет „Блаже Конески“ во Скопје на Катедрата за англиски јазик и книжевност како преведувач и толкувач од англиски на македонски јазик и обратно. Магистрирала во областа на менаџментот и човечките ресурси. Авторка е на три романи и една збирка поезија за возрасни. Една е од основачите на литературниот круг „Васил Иљоски“ основан во Крушево, а членка е на друштвото на писателите „Битолски книжевен круг“. Сликовницата „Мравката Данка Спанка го спасува Божиќ“ е нејзина прва објава за деца.
Ф.Д.
