Руската Федерална служба за безбедност (ФСБ) соопшти дека спречила експлозија за која вели дека ја планирале украинските разузнавачки служби на гасовод во Серпуховскиот округ во Московската област.
Во соопштението се вели дека руски државјанин (56) бил фатен на дело во Серпуховскиот округ „во текот на ноќта, додека се обидувал да постави импровизирана експлозивна направа“ и бил уапсен – објави „РИА Новости“, а пренесе „Танјуг“.
ФСБ соопшти дека овој месец, постапувајќи по упатствата на украински курир, рускиот државјанин купил возило и електрична дупчалка, по што ги искористил добиените координати за да пронајде рачно изработени експлозивни направи во скриен магацин.
– На барање на украинските разузнавачки служби, човекот требало да дупчи дупка во земјата над гасовод, а потоа да активира и постави импровизирана направа. По завршувањето на задачата, требало да патува во странство и да се врати во Украина преку трети земји – соопшти ФСБ.
