Вооружени лица киднапираа повеќе од 300 деца и персонал од католичкото приватно основно и средно училиште „Света Марија“ во Нигерија на 21 ноември. Ова беше трето вакво злосторство што се случува во земјата во рок од една недела.
Киднапирањето за откуп од страна на криминални банди стана голем проблем во многу делови од Нигерија. Поминаа повеќе од десет години откако милитантната исламистичка група Боко Харам киднапираше 276 девојчиња од училиште во градот Чибок, североисточна Нигерија, во 2014 година. Инцидентот привлече меѓународно внимание и предизвика глобална кампања за враќање на децата. Многумина од киднапираните во Чибок избегаа или беа ослободени, но речиси сто деца сè уште се водат како исчезнати.
Зошто киднапирањата сè уште се случуваат?
Поголемиот дел од северна Нигерија се соочува со хронична несигурност. Тука, киднапирањата се изведуваат по одреден модел – вооружени банди на мотоцикли напаѓаат одредена област, пукаат за да го исплашат локалното население, ги киднапираат жртвите и брзо исчезнуваат во блиските шуми. Експертите веруваат дека нападите се од финансиска природа, а не религиозно мотивирани. Згора, велат дека цел им се училиштата, бидејќи злосторниците веруваат оти повеќето од нив имаат релативно слаба безбедност. Аналитичарите исто така велат дека киднаперите сметаат оти родителите веројатно ќе платат откуп за да им се вратат децата.
Во меѓувреме, на североистокот, екстремистичките групи како Боко Харам не дејствуваат само заради финансиски добивки туку се мотивирани и од милитантната форма на исламот, која пропагира отфрлање на западното образование, како и верување дека женските деца воопшто не треба да се образоваат.
Според Обединетите нации, кампањата на терор трае повеќе од една деценија и досега резултира со масовно раселување и многу смртни случаи. Експертите посочуваат и дека безбедноста се влошила по влезот на оружје во Нигерија преку порозните граници на земјата пред повеќе од една деценија.
Забранета исплата на откуп
Владата забрани исплата на откуп како дел од напорите за намалување на дотокот на пари за криминалните банди – но тоа има мал ефект. Некои од регионалните власти, особено во северниот дел на земјата, ги затворија училиштата поради киднапирањата. Но зголемената несигурност предизвикува гнев и страв во Нигерија, бидејќи граѓаните бараат посилни мерки за заштита на децата.
Нигериската армија се обидува да се справи со киднапирањата низ северот на земјата, особено на североистокот, но нејзините ресурси се сериозно ограничени. На северозападот, владата исто така се потпира на локални лидери за да се обиде да склучи договори со бандите за враќање на киднапираните деца.
Некои аналитичари велат дека постои директна корелација помеѓу киднапирањата, економијата на Нигерија, лошата инфраструктура и зголемувањето на несигурноста – особено на северот на државата. Во неодамнешен уреднички текст во весникот „Нигерија бизнисдеј“ се наведува дека недостигот од можности за вработување во Нигерија „можеби го храни каналот за регрутирање членови на бандите“.
– Киднапирањето за многумина маргинализирани млади стана единствениот видлив пат до заработка. Кога криминалот ќе стане аспиративен, државата веќе ја губи стратешката позиција – се наведува во написот.
Консултантската компанија „Ес-би-ем интелиџенс“ фокусирана на Африка, вели дека се потребни „напредни технологии за следење“ за да ги уништат финансиските мрежи на киднаперите, но стабилизирањето на економијата се нагласува како итен приоритет за „поткопување на регрутирањето криминалци“.
Американскиот претседател Трамп застана во одбрана на
христијаните во Нигерија
Масовните киднапирања следуваат откако политички функционери во САД, вклучувајќи го и претседателот Доналд Трамп, истакнаа дека христијаните се соочуваат со прогонства во Нигерија – обвинувања што нигериската влада ги отфрла. Со месеци активистите и политичарите во Вашингтон тврдат дека исламистичките милитанти систематски ги напаѓаат христијаните во Нигерија.
Во текот на месецов Трамп рече дека ќе испрати трупи во Нигерија ако владата на африканската нација „продолжи да дозволува убивање христијани“.
Нигериските власти ги нарекоа тврдењата дека христијаните се соочуваат со прогонства како „грубо лажно претставување на реалноста“. Официјален претставник на нигериските власти рече дека „терористите ги напаѓаат сите што ја отфрлаат нивната убиствена идеологија – муслиманите, христијаните и луѓето без вера“.
