По концертот на Националниот џез-оркестар на „Сплитско лето“
Националниот џез-оркестар одржа успешен концерт на 30 јули во Сплит, кој беше дел од престижниот фестивал „Сплитско лето“. Под ѕвезденото небо, на древниот Перистил, оркестарот, заедно со извонредната Марија Мендеш и под диригентската палка на маестро Владимир Николов, создаде музичко доживување што допре до срцата на сите присутни.
Како што пренесува „Далматински портал“, концертот на многубројните жители на Сплит им подари музичко доживување во кое се спојуваат страсниот звук на биг бендот и магијата на џезот испреплетена со ноти од фадо, оставајќи длабок впечаток кај публиката. Просторот беше исполнет до последното место и одекнуваше во ритамот на современиот џез, вешто испреплетен со таинствената длабочина на португалското фадо.
Македонскиот национален џез-оркестар ги обединува џез-музичарите од Македонија и меѓународно признаените гости-уметници. Основан како национална институција во 2024 година, брзо стана, како што истакнаа организаторите, централна сила во културниот живот на земјата. Меѓу гостинските уметници се издвојуваат вокалистите Курт Елинг и Марија Мендеш, чии настапи придонесоа за поголем меѓународен углед на оркестарот. Претстојната сезона носи соработки со Дони Мекаслин, Курт Розенвинкел и Јелоуџекетс. Претходните проекти вклучуваат соработки со уметници како Дон Менца, Луис Бонила, Адедеџи, Франческо Беарцати, Дарко Рундек, Рамбо Амадеус и многу други.
Марија Мендеш е позната по комбинирањето на џезот со традиционалната фадо-музика. Четири пати номинирана за наградите „греми“ и „латиногреми“, со четири критички признаени албуми, таа ја освои публиката низ целиот свет. Од нејзината родна Португалија до нејзиниот нов дом во Холандија, Мендеш патуваше низ богатиот свет на музичкиот израз. Опишана од списанието „Даунбит“ како „џез-пејачка од највисока класа“, таа доби пофалби од музички великани како Квинси Џонс и Хермет Паскоал. Настапувала на престижни сцени и фестивали во Њујорк и Монтре и на џез-фестивалот на Северно Море.
Владимир Николов е меѓународно признаен диригент, композитор и аранжер, кој соработувал со врвни оркестри и уметници, вклучувајќи ги „Метропол оркест“, „Концертхаусорчестер Берлин“, Бриселската филхармонија, „Херитиџ оркестар“, „Би-би-си концерт оркестар“, Џон Клејтон, Ренди Брекер, Винс Мендоза, Чака Кан, Џулс Бакли, Џејкоб Колиер и многу други. Неговиот опус опфаќа широк спектар на музички јазици и жанрови, а класичната музика и џезот му служат како почетна точка. Долго време работи „зад сцената“ на големи оркестарски проекти низ целиот свет како аранжер, честопати настапувајќи како диригент со реномирани солисти и ансамбли. Тој е ководач на бендот „Николов-Ивановиќ Ундектет“, кој списанието „Даунбит“ го опиша како „најкреативниот голем џез-бенд во Европа денес“.
