Легендарната слика на Леонардо да Винчи ќе добие просторија што подобро ја отсликува нејзината важност како дел од големото реновирање на музејот. „Мона Лиза“ ќе добие своја нова соба во уметничкиот музеј „Лувр“ во Париз, што ќе овозможи уште подобро да биде изложена пред посетителите.
„Лувр“, кој е најпосетуваниот музеј во светот, ќе добие и нов влез за подобро управување со протокот на посетители. Постојниот влез под централната стаклена пирамида се планира да биде редизајниран и претворен во нови изложбени сали. Претседателот Емануел Макрон најави реновирање на музејот и посебна просторија за „Мона Лиза“. Проектот треба да биде завршен до 2031 година, а вредноста на инвестицијата се проценува на неколку милиони евра. Се очекува бројот на посетители да се зголеми од сегашните 9 милиони годишно на дури 12 милиони. Трошоците ќе бидат финансирани од сопствени приходи на „Лувр“, донации и зголемени цени на билетите.
Од јануари 2026 година, секој што не е Европеец ќе мора да плати повеќе за да го посети музејот, иако сумата не е објавена. „Лувр“ веќе неколку години привлекува внимание со својата дотраена состојба. Тоа вклучува штета предизвикана од навлегување вода, застарени технички уреди и загрижувачки температурни флуктуации што ги загрозуваат уметничките дела.
Централниот влез под големата стаклена пирамида за првпат беше искористен во 1988 година и беше дизајниран за четири милиони посетители.
