Од 1967 до 1986 година Твентиман беше одговорен за откривање низа легенди на Ливерпул, вклучувајќи ги Иан Раш (рекордер со 346 гола), Фил Нил (најкорисниот играч, со 23 трофеи за 11 години во клубот), Кевин Киген (освојувач на две „златни топки“) и Алан Хансен (капитен, со вкупно 15 трофеи). За тоа време, клубот четири пати беше европски првак, освои девет титули во лигата, два купа на УЕФА, еден Суперкуп на УЕФА, два ФА-купа и четири трофеи во Лига-купот
ФУДБАЛ
Џеф Твентиман беше ангажиран од менаџерот на Ливерпул, Бил Шенкли, во 1967 година за да најде нов фудбалски талент, а во период од две децении, почитуваниот скаут помогна да се изградат најуспешните тимови на Ливерпул од седумдесеттите и осумдесеттите години од минатиот век, пишува „Би-би-си“. Синот на Твентиман, Џеф Јуниор, зборуваше за поткастот на Спортинг Витнес за неговиот татко, кого го опиша како „фундаментален“ за „оживувањето“ што Шенкли го создаде на стадионот „Енфилд“. Помеѓу 1967 и 1986 година, Твентиман беше одговорен за откривање низа легенди на Ливерпул, вклучувајќи ги Иан Раш, Фил Нил, Кевин Киген и Алан Хансен. За тоа време, клубот освои девет титули во лигата, четири трофеи за европски првак, два купа на УЕФА, еден Суперкуп на УЕФА, два ФА-купа и четири пехари во Лига-купот.
Твентиман беше дефанзивец во тимот на Шанкли, Карлајл во текот на 1950-те и отиде во раководство одреден период откако се повлече од својата играчка кариера. Сепак, неговиот син вели дека поранешниот фудбалер работел на работа што вклучувала собирање јајца од фарми кога добил повик од неговиот стар шеф во 1967 година. Џеф Јуниор во тоа време имал осум години и вели дека неговиот татко немал многу разбирање за „големината на можноста“, за да го поздрави додека тргнува од Карлајл кон Ливерпул за да се сретне со Шенкли, пишува „Би-би-си“.
Под водство на Шенкли, Ливерпул победи во Втората лига и ја освои титулата на Англија во 1964 и во 1966 година. Црвените го освоија и својот прв ФА-куп во 1965 година. Сепак, како што објаснува Џеф Јуниор, екипата „почнала да старее“ и шефот на Ливерпул сфатил дека му е потребна „производствена линија“ на нови играчи. Тоа беше работата со која беше задолжен Твентиман кога стана нов главен скаут на Шенкли. Откако му се придружи на клубот, човекот од Карлајл стана редовен на состаноците на кои Шенкли ќе се среќава со неговите соработници, вклучувајќи ги и идните менаџери Боб Пејсли, Рони Моран и Џо Фаган, за да разговараат за тактиките и за насоката.
Како скаут, Твентиман „се гордееше што наоѓа играчи од пониските лиги“, според неговиот син. Во 1971 година тој го забележал 20-годишниот Кевин Киген како игра во четвртата дивизија за Сканторп, а Ливерпул го ангажирал за 35.000 фунти. Напаѓачот Киген подоцна освои две награди „златна топка“.
Познавајќи ја четвртата дивизија, Твентиман исто така го информира клубот за бекот на Нортемптон таун, Фил Нил, донесен на „Енфилд“ во 1974 година за сума од 66.000 фунти. Нил беше првото менаџерско засилување на Пејсли и стана најкорисниот играч на Ливерпул, освојувајќи 23 трофеи за 11 години во клубот.
Во 1980 година Ливерпул плати 300.000 фунти за да го донесе 19-годишниот напаѓач Иан Раш од Честер од Третата лига. Таа сума беше британски рекорд за тинејџер во тоа време. Џеф Јуниор тврди дека Пејсли всушност никогаш не го видел Раш како игра кога го ангажирал, но бил убеден од препораката на Твентиман, пишува „Би-би-си“. Велшкиот напаѓач уште е рекордер на Ливерпул на сите времиња, со 346 гола.
Твентиман исто така го ангажира и Алан Хансен од шкотскиот прволигаш Патрик Тистл во 1977 година за 100.000 фунти. Хансен стана капитен и со „црвените“ освои вкупно осум титули во лигата, три европски купа, два ФА-купа и четири Лига-купа. Џеф Јуниор се сеќава на неговиот татко како зборувал за Хансен по патувањето во Шкотска. Тој вели дека Твентиман не можел да одлучи која позиција најмногу му одговара на играчот, бидејќи го видел и во централната одбрана и во средниот ред. Во Ливерпул, Хансен стана „еден од првите централни бекови“, вели Џеф Јуниор, кој „може да излезе со топката и да помине покрај противничките напаѓачи“.
Твентиман го напушти Ливерпул за да работи за Ренџерс во 1986 година, а почина во Саутпорт во 2004 година на 74-годишна возраст, пишува „Би-би-си“. Во март годинава пред стадионот „Енфилд“ беше откриена плоча на која се слават тој и другите од славната соба за состаноци на Шенкли. Н.М.
