Ако барате олеснување од летните горештини, одолејте на нагонот драматично да ја намалувате температурата на термостатот на вашиот клима-уред. Експертите велат дека намалувањето на термостатот само ќе го оптовари клима-уредот, кој веќе мора да работи понапорно кога е жешко.
Ова лето веќе станува историски жешко, зголемувајќи ги шансите оваа година да биде најжешката на Земјата досега. Екстремните временски услови предизвикуваат загриженост за неисправности во електричната мрежа и изложеност на опасна топлина. Во овој поглед, многумина бараат „рецепт“ за најефикасен начин за користење на климата за да го разладат својот дом што е можно полесно и побрзо во топлите летни денови.
Пониската температура не значи побрзо ладење
Кога внатрешната температура е потопла од онаа на која е поставен вашиот термостат, вашиот систем се вклучува. Меѓутоа, поставувањето на термостатот на навистина ниска температура не го зголемува капацитетот за ладење на клима-уредот.
Ако го поставите термостатот на температура што го надминува капацитетот на вашиот клима-уред, системот ќе продолжи да работи додека се обидува да го излади вашиот дом до таа точка. Исто така, неговото континуирано работење троши енергија и може да го скрати рокот на траење на уредот.
Најдобра температура кога е жешко
Едно истражување спроведено на кампусот на универзитетот „Џорџија“ во Атина во летото 2014 година покажа дека луѓето се чувствуваат удобно на внатрешни температури помеѓу 21 и 25 степени Целзиусови.
Американската агенција за заштита на животната средина предлага луѓето да ги постават своите климатизери на 25 степени во текот на летото додека се дома за да ја максимизираат заштедата на сметките за комунални услуги. Меѓутоа, удобноста е субјективна и она што одговара за едно домаќинство може да не одговара за друго.
Најдобрите поставки кога сте излезени
Кога сте надвор од дома подолг временски период, експертите предлагаат да го поставите термостатот од три до шест степени потопло отколку што вообичаено би ви било удобно.
Програмирањето на термостатот на повисока температура осум часа на ден може да резултира со годишна заштеда на енергија од дури 10 проценти при греење и ладење.
Други методи за ладење
Кога надвор е навистина топло, можете да почувствувате дека е потопло во затворен простор, иако термостатот е поставен на температура што е обично удобна за вас. Наместо да ја намалувате температурата, можете да користите други методи за ладење. На пример, таванските вентилатори можат да бидат многу корисни и обично бараат малку енергија за работа.
Погрижете се вашите ролетни да бидат затворени во најжешките делови од денот. Избегнувајте да користите уреди како што се машини за миење садови, печки, рингли и сушилки, кои можат да ги направат просторите потопли и влажни и да го принудат вашиот клима-уред да работи понапорно.
