На крунисувањето ќе присуствуваат околу 2.000 гости, вклучувајќи и членови на кралското семејство, шефови на странски држави и други достоинственици, а меѓу нив и македонскиот претседател Стево Пендаровски
Задутре ќе се одржи церемонијата на крунисувањето на кралот и кралицата на Обединетото Кралство
Крунисувањето на кралот Чарлс Трети ќе се одржи во Вестминстерската опатија. Чарлс ќе биде четириесеттиот монарх што бил крунисан во Вестминстерската опатија по Вилијам Први познат како Вилијам Освојувачот во 1066 година.
За време на церемонијата, Камила, кралицата придружничка, ќе биде крунисана покрај кралот. На крунисувањето ќе присуствуваат околу 2.000 гости, вклучувајќи и членови на кралското семејство, шефови на странски држави и други достоинственици.
По церемонијата, кралот Чарлс и кралицата Камила ќе се вратат во Бакингемската палата во златната државна кочија на чело на поворката за крунисување, традиција што постои од крунисувањето на кралот Вилијам Четврти во 1831 година. Тие потоа ќе се појават на балконот со другите членови на кралското семејство за да ја следат шестминутната парадна формација.
Свеченостите ќе траат уште два дена, вклучувајќи концерт во замокот „Виндзор“ и настани низ целата земја.
Македонскиот претседател Стево Пендаровски ќе присуствува на церемонијата на крунисувањето на британскиот крал Чарлс. Од кабинетот на Пендаровски потврдија дека претседателот добил покана од Бакингемската палата, ја прифатил и ќе оди на крунисувањето на кралот Чарлс.
На крунисувањето се поканети шефови на држави со кои Лондон има целосни дипломатски односи, како и претставници на британските региони и прекуокеанските територии.
