Намалување на времето на патување со воз, подобра соработка меѓу царината, граничната полиција, фитосанитарната, ветеринарната и радиолошката инспекција на Македонија и на Србија предвидува проектот за изградба на заеднички железнички граничен премин меѓу двете земји на граничниот премин Табановце што денеска беше презентиран во ЕУ-Инфоцентарот.
Во проектот се предвидува изградба на објект од околу 2.400 метри квадратни во вредност од околу 4,5 милиони евра, во кој ќе бидат сместени вработените на граничната полиција, на царинските управи, инспекциските служби, како и државните железнички компании од Македонија и Србија.
– Целокупниот граничен систем, вклучувајќи ги и инспекциските контроли, ќе функционираат заеднички во тој објект со што ќе се овозможи побрз и поефикасен транспорт на стока и патници – рече министерот за транспорт и врски Горан Сугарески на презентацијата на проектот и најави дека со тоа патничкиот железнички сообраќај ќе се забрза за еден час, а транспортниот за два часа.
Со проектот, како што посочи, се предвидува изградба и на нов пристапен пат до железничкиот премин, како и нова пречистителна станица за да се подобри снабдувањето со вода и електрична енергија.
Министерот за транспорт нагласи дека Владата до крај на годинава ќе аплицира за грант преку инструментот на инвестициска рамка на Западен Балкан на ЕУ и додаде дека веќе е добиена поддршка за обезбедување средства за инвестицијата од Европската банка за обнова и развој (ЕБОР).
– Во завршна фаза е изработката на тендерската документација за изградба, а набрзо ќе биде објавен и јавниот повик. Се надевам ако работите се одвиваат согласно договорената динамика изградбата да започне во 2020 година, а за четири години проектот да биде целосно завршен – рече Сугарески.
Евроамбасадорот Самуел Жбогар нагласи дека станува збор за пилот-проект за Западен Балкан со кој, како што кажа, ќе се забрза транспортот на патници и стоки и ќе се покаже дека регионот е значаен за ЕУ.
