Германските власти уапсија и обвинија германски државјанин под сомнение дека шпионирал за кинеските тајни служби, соопшти германското Обвинителство.
Во соопштението се наведува дека обвинетиот, идентификуван како Клаус Л., е политиколог и работи во група експерти од 2001 година.
Кинеската разузнавачка служба го ангажирала обвинетиот за време на неговото патување во Шангај во 2010 година по што тој до ноември 2019 година редовно испраќал информации за пари и патувања во Кина.
Обвинетиот денеска ќе се појави на суд во Минхен. Клаус Л. наводно добивал информации преку високи политички контакти што ги сретнал додека работел со група експерти.
Телевизијата АРД тврди дека обвинетиот работел за фондацијата „Ханс Зајдел“ во Минхен, блиска до Христијанско-социјалната унија на Баварија (ЦСУ), сојузник на канцеларката Ангела Меркел.
