„Магла“ е насловот на најновата песна на Антониа Гиговска, дел од студискиот материјал што треба да биде комплетиран до крајот на годинава.
Песната во која Антониа верува е со потпис на Лазар Цветковски, чии се музиката и аранжманот, додека текстот е на Тајзи. Се работи за модерна тема, која има потенцијал за кратко време да го носи предзнакот – летен хит. Видеото, пак, во кое Антониа се претставува во едно сосема поинакво светло, е работено под режисерската палка на Даниел Јовевски.
– „Магла“ е дел од албумот „2001“, кој ќе содржи 12 песни, меѓу кои некои веќе пуштени во етерот, но и некои комплетно нови. Задоволна сум од тоа како излезе песната, иако е направена спонтано и буквално во еден здив. А дека е „љубов на прв поглед“, доволно зборува тоа што е отпеана и спакувана од прва. Се надевам дека и публиката ќе го почувствува она што и јас, и навистина можам слободно да кажам дека ова е можеби една од песните на која најмногу ѝ верувам – вели Антониа.
