Ноќта на вештерките за многумина е омилен празник, поврзан со слатки мистериозни суштества и страшни настани. Карактеристичните бои на празникот, кој се слави на 31 октомври, се црната и портокаловата, а нивното значење, всушност, е поврзано со сезоната во која се празнува.
Според Лесли Банатајн, писателка и историчарка, овој страшен празник не бил масовно прославуван сѐ до крајот на 1800-тите години, особено во САД, а прославите биле многу повеќе ориентирани кон рачно изработени украси. Во тој период, целиот декор и костими биле рачно изработувани, а домаќинките во своите домови изложувале тикви и лушпи од пченка.
Природните бои со кои можеле да работат кон крајот на октомври биле претежно портокаловата и жолтата, кои ги добивале од тикви, хризантеми, невен, пченка. Но декорацијата на забавата за Ноќта на вештерките создавала и вонземска страшна атмосфера, за што била потребна и доза темнина – вели Банатајн.
Компаниите на крајот ги комерцијализираа празничните бои во форма на хартиени костими и украси за забава. Компанијата „Денисон“ ги претстави своите први хартиени украси за Ноќта на вештерките во 1909 година. Тие имале суштества од приказните за Ноќта на вештерките, како што се вештерки, мачки и лилјаци, кои често биле печатени во црна боја и храна за жетва, како и суштества од тиква, кои обично биле портокалови или жолти.
Компанијата „Бејсл“, исто така, помогна да се зацврстат црната и портокаловата боја како бои за Ноќта на вештерките, користејќи ги овие нијанси на своите слики. Меѓутоа, првично имало исклучоци од овие сега приспособени бои за Ноќта на вештерките. На почетокот на 20 век, на некои разгледници за Ноќта на вештерките имало вештерки во црвени или виолетови фустани и лампиони во зелена боја.
Кога другите компании ја забележаа зголемената популарност на Ноќта на вештерките, производителите на бонбони, дизајнерите на костими и масовните медиуми го следеа примерот, создавајќи и пласирајќи ги своите производи со популарни фолклорни слики и сега препознатливите бои – додава Банатајн.
Во однос на симболичното значење на портокаловата и црната за Ноќта на вештерките, писателката истакнува дека црната боја е првиот претставник на темнината, бидејќи Ноќта на вештерките отсекогаш се сметала за ноќен празник. Додека портокаловата е бојата на огнот и есенската сезона, бидејќи нијансата потсетува на жетва.
Овие бои имаат смисла: Ноќта на вештерките е на прагот на зимата и отсекогаш се однесува на преминот од светлиот дел од годината (лето) во потемниот (зима) – вели писателката.
