Вратите на Турскиот театар се отворени од 1950 година. Но многумина од луѓето и денес не знаат дека претставите се синхронизирани на македонски јазик, а последните три години претставите се играат на сцената на „Театар комедија“, вели Ајлин Емин Скоро, директорката на Турскиот театар
Ајлин Емин Скоро, директорка на Турскиот театар
Првата премиера на Турскиот театар во Скопје била „Сомнително лице“ од Бранислав Нушиќ, прикажана во Салонот на МНТ на 8 јули 1950 година. Режисер на претставата бил Абдуш Хусеин. Турскиот театар во Скопје бил единствениот професионален театар не само на Балканот туку и во светот. Признанијата што ги добил Турскиот театар во овие 73 години од компетентни македонски и светски театарски жирија, како и од критиката, се многубројни. Во текот на својата дејност, Турскиот театар е и своевидно училиште на театарските експерти, полигон за обучување млади писатели, режисери, актери, сценографи, костимографи, кои потоа оставија видна трага во нашиот целокупен простор.
Со директорката Ајлин Емин Скоро разговаравме за репертоарот на Турскиот театар, посетеноста и идните планови на оваа културна институција.
Што има на репертоарот на Турскиот театар во моментов?
– Репертоарот за февруари го започнавме на 7 февруари, со детската претстава „Рапунзел“, во режија и адаптација на Џабир Доко. На 23 февруари, во 20 часот, ќе се игра претставата „Бела фигура“ на Јасмина Реза, во режија на Ирена Стеријовска, која во септември имаше премиера. На 15-ти, во 20 часот, ќе се игра „Човек перница“ на Мартин Мекдона, во режија на Сибел Абдиу, и на 25-ти, во 20 часот, е комедијата „Кројач за дами“ според Жорж Фејдо, во режија на Синиша Ефтимов. Генерално, репертоарот на Турскиот театар е разновиден, имаме од класични до модерни автори. Се трудиме да одржиме рамнотежа меѓу класичното и модерното. Бидејќи програмата за оваа година веќе е позната, во преговори сме со некои домашни и странски режисери за програмата за 2023 година.
Кои се помалку познати факти што публиката не ги знае за Турскиот театар, а треба да се општопознати?
– Претставите во Турскиот театар имаат превод на македонски јазик. Ова е практика повеќе од дваесет години, но, сепак, пошироката јавност не е запознаена со ова.
Колкава е посетеноста на претставите, колку овој театар е препознаен од публиката и афирмиран од државата?
– Мора да напоменам дека Турскиот театар е единствениот театар како национална установа во Европа што надвор од границите на Турција работи 72 години и ја афирмира, ја промовира турската култура со претставите што ги игра на турски јазик. И покрај малиот ансамбл, сепак публиката го препознава Турскиот театар по квалитетните изведби и професионалната екипа. Се трудиме да учествуваме на театарските фестивали во државата. Во 2022 година на фестивалот „Војдан Чернодрински“ наградата за главна женска улога ја доби доајенката на Турскиот театар, Бедија Беговска, за улогата на Љубов Андреева во претставата „Вишновата градина“ на Чехов. Додека наградата за млад актер „Трајко Чоревски“ ја доби Хакан Даци за улогата на Јаша во истата претстава, во режија на Илија Милчин. Потоа следуваше гостување на „Охридско лето“, со претставата „Галеб“, во режија на Нела Витошевиќ, и во декември со претставата „Човек перница“ имавме гостување во Штипскиот театар. Наедно, оваа година Турскиот театар го доби признанието Повелба на Република Северна Македонија од претседателот Стево Пендаровски.
Какви се плановите и проекциите за годинава?
– Се подготвуваме за 10. Балкански театарски фестивал, кој ќе се одржи во Бурса, Турција, на кој ќе гостуваме со претставата „Кројач за дами“, во режија на Синиша Евтимов. Имаме уште неколку покани за гостување, но тоа зависи од буџетот, кој, за жал, и оваа година ни е скратен. Минатата недела потпишавме договор со онлајн платформа за театарски претстави, морам да пофалам дека во моментот сме единствен театар во државата што учествува во оваа платформа. Наскоро ќе бидат прикажани и нашите нови претстави. Покрај сите тешкотии поради економско-енергетската криза, се надевам дека ќе имаме успешна театарска година.
Какви се прогнозите за преселбата во вашата нова зграда?
– Веќе осум години делиме една иста сцена со „Театар комедија“. Сѐ уште се среќавам со прашањето: „А каде е сега Турскиот театар?“ Долг период не се работеше, беше останата само карабина. Последните три години интензивно се работи, во последна фаза е изведбата на фасадата со конструкција, како и изведбата на покривот. По завршувањето на фасадата и покривот следуваат инсталатерските работи. Новата зграда е замислено да функционира како културен центар за промовирање на турската култура и традиција. Не можам да шпекулирам со датуми кога би била преселбата во новата зграда.
