Во просториите на Македонски народен театар денеска се одржа прес-конференција посветена на новиот мјузикл „Као Какао“, кој наскоро ќе биде изведен пред македонската публика. Екипата најави динамична, современа и емотивна претстава исполнета со музика, танц и хумор, која носи приказна за пријателството, љубовта и животните предизвици на младите.
На средбата со новинарите, режисерот, кореографката и актерската екипа истакнаа дека станува збор за проект на кој се работело со голема посветеност и ентузијазам. Посебен акцент бил ставен на сценографијата, костимите и музичките нумери, кои треба да создадат вистинско мјузикл доживување за публиката.
„Као Какао“ носи модерна сценска енергија и приказна со која многумина ќе можат да се идентификуваат. Од МНТ велат дека очекуваат голем интерес, особено кај помладата публика, но и кај љубителите на театарот и музиката.
Актерите открија дека подготовките биле интензивни и исполнети со многу проби, кореографии и вокални изведби, но дека атмосферата во тимот била одлична. Тие ја поканија публиката да биде дел од премиерните изведби и да ужива во, како што велат, „една поинаква и освежувачка театарска приказна“.
Продуцентот Владимир Мандичевски рече и дека овој мјузикл е веќе подготвен за меѓународна сцена и е понуден во повеќе земји, со надеж дека „Као Какао“ ќе ја надмине домашната публика и ќе стане регионален културен проект. Тој истакна дека квалитетот на музиката на Влатко Стефановски, како и тимот составен од врвни професионалци, даваат силна основа мјузиклот успешно да се претстави и надвор од границите на Македонија.
Текстот е напишан од Венко Андоновски, режијата е на Дејан Пројковски, аранжманите се на Бобан Мирковски, кореографијата на Олга Панго, а сценографијата на Валентин Светозарев. Костимите ги изработи Марија Пупучевска, а вокална менторка е Ана Костадиновска.
Во мјузиклот настапуваат врвни актери и музички изведувачи меѓу кои се Катерина Јовановиќ, Владимир Петровиќ, Биљана Драгиќевиќ-Пројковска, Јордан Симонов, Рубенс Муратовски, Тања Кочовска и Нина Елзесер. Дел од актерската екипа се и Ања Митиќ, Григор Јовановски, Стефан Спасов, Антонио Ташковски, Наталија Теодосиева, Денис Абдула, Јована Спасиќ, Димитар Паскоски, Илин Јовановски, Тодор Стојковски, Бранко Михајловски, Ѓорге Нешковиќ, Анастасија Трајковска, Јована Миладинова, Анастасија Митровска и Леонида Гулевска.
Премиерата на мјузиклот „Као Какао“ ќе се одржи на 2 и 3 јуни на сцената на МНТ, а Влатко Стефановски порача дека нѐ очекува спектакуларна премиера. Следните проекции по премиерата се закажани за 11 и 12 јуни.
