Младите ја преземаат режисерската палка
Во организација на „Киненова“ и Општина Кисела Вода, во Домот на културата „Билјана Беличанец“ успешно се реализира тридневната филмска работилница за основци „Снимај паметно, остави трага“. Овој иновативен проект, кој се одржува под менторство на истакнатата македонска филмска режисерка Марија Џиџева, се фокусира на една од најчувствителните теми во современото општество – насилството меѓу децата и младите, со акцент на врсничкото насилство и насилството на интернет. Проектот има цел да ги трансформира паметните телефони на т.н. алфа-генерација – деца родени и израснати со технологија – од потенцијален извор на дигитално насилство во моќна уметничка алатка за социјални промени. Учениците од осмо и деветто одделение низ интензивни лекции ги поминаа сите фази на филмското изразување: од генерирање идеја и пишување сценарио, преку снимање со мобилни телефони, па сè до финална монтажа.
Тие учат како да ги преточат своите лични соочувања со врсничкото насилство во филмски сценарија. Ова не е само едукација – ова е платформа каде што гласот на децата станува визуелна реалност, а возрасните се тука за да научат како децата го доживуваат светот денес.
– Работилницата е наменета токму за децата што секојдневно се изложени на технологијата, што придонесува за алармантно зголемување на врсничкото насилство. Целта на овие кратки форми е тимски да создадеме филмови каде што ќе го чуеме гласот на младите, ќе откриеме што ги мачи и ќе им помогнеме на возрасните подобро да разберат како децата денес ги доживуваат булингот и сајбернасилството – истакна менторката Џиџева.
Кратките филмови што децата ги создадоа во рамките на тридневната работилница ќе ја доживеат својата официјална премиера пред пошироката јавност на големото платно за време на меѓународниот филмски фестивал „Киненова“.
