Говорејќи пред новинарите во Киев, Зеленски рече дека Украина преку повеќе дипломатски канали испратила порака дека е подготвена за средба со Путин во присуство на западните лидери. Тој нагласи дека учеството на САД и европските партнери би можело да создаде услови за носење конкретни одлуки за завршување на војната.
– Подготвени сме да се сретнеме со Путин за време на Г-7, бидејќи таму се Трамп и Макрон. Европа и Америка се согласија, но Русија повторно покажа дека не е подготвена за разговори – изјави Зеленски, пренесе „Ројтерс“.
Според украински извори, Киев за предлогот ги информирал и САД и Франција, а поканата била доставена и до руската страна. Сепак, од Кремљ не пристигнал јасен одговор.
Зеленски откри и дека разговарал со Трамп за можноста ваква средба да биде организирана во САД, во формат кој би го отежнал евентуалното одбивање од страна на Путин. Доколку Русија ја отфрли и оваа опција, според украинскиот претседател, меѓународната заедница ќе треба дополнително да го зголеми притисокот врз Москва, пишува „Ројтерс“.
Изјавата доаѓа во пресрет на самитот на Г-7 во францускиот град Евијан, каде што Украина и понатаму е една од главните теми на разговорите меѓу светските лидери.
Во меѓувреме, Путин претходно јавно изјави дека не гледа причина за директна средба со Зеленски во овој момент, што дополнително ги намалува очекувањата за брз дипломатски пробив меѓу двете завојувани страни.
