Вулканската активност на Етна предизвика сериозни проблеми во воздушниот сообраќај на Сицилија, откако густиот вулкански пепел го принуди аеродромот во Катанија да остане затворен петти ден по ред.
Стотици патници останаа заглавени на островот во еден од најфреквентните периоди од годината, непосредно пред Ферагосто – традиционалниот италијански празничен период кога милиони граѓани патуваат на летен одмор.
Според последните информации, аеродромот во Катанија треба да остане затворен до раните утрински часови во сабота, 15 август. Станува збор за најдолг прекин на работата на аеродромот во последните повеќе од две децении.
Етна, еден од најактивните вулкани во светот, продолжува да исфрла пепел и лава. Аеродромот во Катанија се наоѓа на околу 30 километри од вулканот, поради што неговото работење е особено чувствително на промените во вулканската активност.
Истражувачот Борис Бенке од опсерваторијата на Етна предупреди дека вулканскиот пепел претставува сериозна опасност за авионите. Честичките можат да навлезат во моторите и да предизвикаат нивно оштетување или откажување, поради што властите се принудени да преземаат строги мерки.
Бенке оценува дека актуелната активност е необична поради нејзиното траење и континуираното исфрлање пепел. Северните ветрови, пак, го однесоа пепелот и надвор од Сицилија, кон Малта и Северна Африка.
Поради затворањето на Катанија, дел од летовите се пренасочуваат кон другите аеродроми на Сицилија, меѓу кои Палермо, Трапани и Комизо, што создава дополнителен притисок врз копнениот транспорт и инфраструктурата. AP известува дека околу 36 отсто од речиси 2.000 планирани летови во периодот од 6 до 12 август биле откажани, додека повеќе од 600 биле пренасочени.
Проблемите не завршуваат на аеродромите. Поради зголемената побарувачка, патниците се соочуваат и со поскапи такси-превози и изнајмување автомобили. Италијанската организација за заштита на потрошувачите Кодаконс најави дека ќе побара реакција од надлежното тело за заштита на конкуренцијата поради сомнежите за неоправдано зголемување на цените.
Ситуацијата дополнително го отежнува патувањето во периодот на Ферагосто, кога италијанските аеродроми, патишта и железнички линии традиционално се под најголем притисок.
Ерупцијата на Етна во меѓувреме продолжува, а властите внимателно ја следат концентрацијата на пепел во воздухот и условите за безбедно продолжување на авиосообраќајот.
