Портпаролот на Европската унија, Петер Стано, потврди дека ЕУ одлучила да спроведе низа мерки кон Косово, бидејќи не ги презела потребните чекори за деескалација на ситуацијата.
Тој за „Танјуг“ изјави дека работата на органите на „Спогодбата за стабилизација и асоцијација“ е привремено суспендирана, дека е одлучено Косово да не биде покането на настани на високо ниво, билатералните посети да бидат прекинати, освен оние кои имаат за цел решавање на кризата на северот на Косово во рамките на Дијалогот со поддршка на ЕУ.
– Програмирањето на средствата за Косово во рамките на програмската вежба ИПА 2024 исто така е ставено во мирување. Предлозите поднесени од Косово според Инвестициската рамка за Западен Балкан (ВБИФ) не беа поднесени на разгледување од страна на Одборот на ВБИФ на 29-30 Јуни – рече Стано и додаде дека косовските власти за овие мерки биле информирани на 28 јуни.
Тој додаде дека овие мерки се привремени и целосно реверзибилни во зависност од развојот на ситуацијата на терен и одлуките за деескалација што ќе ги донесе премиерот на Косово, Албин Курти.
– ЕУ исто така внимателно следи дали Србија ги исполнува нашите барања и е подготвена да преземе мерки во случај на непочитување – рече Стано.
Тој повтори дека ситуацијата на северот на Косово сериозно го загрижува Брисел и посочи дека „не можеме да си дозволиме нестабилност, тензии и насилство“.
– Го осудивме насилството и продолжуваме да ги повикуваме двете страни на итна деескалација – рече тој.
Тој посочи дека високиот претставник на Унијата за надворешна политика и безбедност, Жозеп Борел, во име на членките на ЕУ, бил многу јасен за очекуваните чекори за итна деескалација.
– Очекуваме Косово да дејствува на деескалирачки начин и веднаш да ги запре полициските операции во близина на општинските згради на северот на Косово. Градоначалниците треба привремено да ги извршуваат своите должности во други простории, а не во општинските згради. Предвремените избори треба да се распишат што е можно поскоро во сите четири општини и да се организираат на целосно инклузивен начин. Тоа значи со целосно и безусловно учество на косовските Срби. Неопходно е ЕУ да го олесни дијалогот предводен од висок претставник и да продолжи со брзото спроведување на Договорот на патот кон нормализација и неговиот Анекс за имплементација. Тука спаѓа и формирање на заедница на општини со српско мнозинство – заклучи Стано.
Стано најави и дека во следните денови специјалниот претставник на Европската унија за дијалог меѓу Косово и Србија, Мирослав Лајчак ќе ги посети Белград и Приштина.
Тој за „Танјуг“ изјави дека патувањето за да ги види партнерите на теренот е составен дел од работата на Лајчак.
– Специјалниот претставник на Европската унија Лајчак редовно ги посетува Белград, Приштина, главните градови на ЕУ и други места, вклучително и градови кои не се членки на ЕУ, со цел да ја извршува својата секојдневна работа за промовирање на дијалогот – рече тој.
– По минатонеделниот самит на Европскиот совет, високиот претставник Борел побара од специјалниот претставник на ЕУ Лајчак да отпатува во Косово и Србија во наредните денови за да разговара за патот напред – додаде Стано.
Се очекува за време на посетата да се разговара за смирување на тензиите на северот на Косово и за продолжување на дијалогот.
