Културниот центар „Јадро“ одбележува 60 години од катастрофалниот скопски земјотрес со два настана: „26 Јули, 1963“ – изложба на фотографии, видеопроекција и други сеќавања за Скопје во организација на Општина Центар и „Сведоштва за земјотресот“ од Нестор Несторовски во организација на неговата ќерка Солунка Зоксимовска.
Изложбата „26 Јули, 1963“ ќе биде отворена денеска, во 10 часот, во организација на Општина Центар и „Јадро“. Изложбата е конципирана како мултимедијален настан на кој посетителите ќе можат да погледнат документарен филм за Скопје, макети од централното градско подрачје, албуми со приватни фотографии, како и историски фотографии од неколку периоди од развојот на Скопје со акцент на територијата на Општина Центар, предземјотресениот период, катаклизмичниот постземјотресен период, како и обновениот Центар. Изложбата ќе ја отвори градоначалникот на Општина Центар, Горан Герасимовски.
Настанот „Сведоштва за земјотресот“ – читање и проекција на документарен филм, е во организација на Солунка Зоксимовска, а ќе се одржи утре, во 20 часот.
Невидената трагедија што му се случи на Скопје во земјотресот од 26 јули 1963 сѐ уште се раскажува низ многубројни драматични приказни, кои некои запишувачи ги нарекуваат и скопски вистинити легенди. На овој настан, Солунка Зоксимовска ќе ги претстави записите на својот татко, Нестор Несторовски, единствен преживеан од зградата на бул. ЈНА во која тој живеел. Меѓу загинатите се и неговата сопруга и двете деца на возраст од 13 и 14 години, Солуна и Мишко. Сведоштвата започнуваат со настаните што се случиле два дена пред земјотресот, а завршуваат со извлекувањето на Нестор од урнатините на зградата. По претставувањето на записите ќе следува проекција на документарен филм во продукција на Македонската радио-телевизија, кој се базира на потресната приказна и сведоштвата на Несторовски.
