Со почит кон своите корени, македонскиот пијанист од светски глас Симон Трпчески реши македонската претпремиера на својот драгоцен проект „Македонисимо“ да ја изведе во автентичното опкружување на родното место на неговиот татко, живописното струшко село Збажди, сместено во пазувите на областа Малесија, на планината Караорман.
Во предвечерието на големиот христијански празник Голема Богородица, на 27 август од 17.30 часот, Трпчески и пријателите пред љубопитната публика не само од овој крај, ќе изведат приспособена програма од албумот „Македонисимо“ што го обиколи светот – проект во чии рамки на оригинален начин се обработува македонската народна музика од страна на нашиот композитор, Панде Шахов, кој, како што вели Трпчески, „со својот посебен музички јазик ја обои на многу поинаков начин, испреплетувајќи со нашата традиционална музика различни музички стилови“. Уникатниот тим на „Македонисимо квинтетот“ го сочинуваат и Александар Краповски на виолина, Александар Сомов на виолончело; на кларинет, саксофон и на кавал Хидан Мамудов, а зад удиралките е Влатко Нушев.
– Бидете и вие дел од ова несекојдневно доживување, во очекување на скорешните изведби на „Македонисимо“ на сцените од каде што се изнедри ова вонвременско музичко патешествие што го освои светот – велат од здружението за култура и уметност „КултурОп“.
Инаку, Трпчески ја заврши својата концертна сезона 2021/2022 со концертот во петокот, на 5 август на светски познатата сцена „Театро Колон“ во Буенос Аирес, што „Нешнл џиографик“ ја вбројува во десетте најубави оперски сали во светот. На своето деби пред одушевената аргентинска публика, Трпчески заедно со Филхармонискиот оркестар на Буенос Аирес, под диригентската палка на перуанецот Давид дел Пино Клинге, го изведе Вториот концерт за пијано и оркестар од Рахманинов. На овој концерт му претходеа и аплаузите и овациите што Трпчески само во последните триесетина дена ги собра на сцените на уште 3 континенти: Хрватска, Јужна Кореја и САД, а во Отава, Канада, во рамките на „Камерниот музички фестивал“ се случи и северноамериканската премиера на проектот „Македонисимо“.
