Во Скопје денеска беше промовиран нов протокол за постапување со лица без државјанство, со кој институциите воспоставуваат координиран и системски пристап за решавање на новите случаи и подобрување на пристапот до основни права, вклучително и здравствена заштита.
Протоколот е резултат на соработка меѓу Министерство за внатрешни работи, Министерство за здравство и Мисија на ОБСЕ во Скопје, со цел да се надминат досегашните административни празнини и ад хок решенија.
Министерот за внатрешни работи Панче Тошковски оцени дека станува збор за „историски чекор“ во справувањето со бездржавјанството.
– Со овој протокол воспоставуваме јасни процедури и долгорочен механизам за решавање на проблемите на лицата кои со години се соочуваат со административни пречки – изјави Тошковски.
Министерот за здравство Азир Алиу нагласи дека новиот пристап има директно значење за здравствениот систем, овозможувајќи лицата без државјанство да добијат навремен и континуиран пристап до здравствени услуги.
– Овие лица не смеат да останат без здравствена заштита. Со новите процедури ќе бидат евидентирани и третирани како пациенти во системот – истакна Алиу.
Шефот на Мисија на ОБСЕ во Скопје, Килијан Вал, оцени дека протоколот претставува значаен исчекор и надградба на досегашните напори.
Тој потсети дека Македонија е прва земја во регионот што ги решила познатите случаи на бездржавјанство произлезени од распадот на СФРЈ, додавајќи дека новиот документ ќе овозможи идните случаи да се решаваат институционално и ефикасно.
Со протоколот се очекува подобра координација меѓу институциите, побрзо решавање на новите случаи и обезбедување пристап до основни услуги за една од најранливите категории граѓани.
