Не постои реална закана по безбедноста, изјави вечерва министерката за одбрана Славјанка Петровска, при гостување во емисијата „Клик плус“ на ТВ21, додавајќи дека институциите успешно си ја работат својата работа.
– Апсолутно проценките, анализите и информациите со кои располагаме велат дека до овој момент не постои реална закана за безбедноста во Северна Македонија – нагласи министерката за одбрана.
Во врска со случајот за наводно сексуално вознемирување во Армијата што денеска од собраниската говорница го актуелизира пратеникот на ВМРО-ДПМНЕ Драган Ковачки, таа кажа дека за таков случај досега не била информирана.
– Ако нешто до мене стигне како информација, секогаш без двоумење и притоа без да водам јас истрага, веднаш го повикувам шефот на военото разузнавање и информирам за сите информации кои стигнале до мене – изјави Петровска.
