Најавите се дека сепак е можно на 23 јуни да се случи и да се организира меѓувладина конференција на Македонија со ЕУ, секако тоа ќе биде еден позитивен исчекор напред, а потоа е можно усогласувања и договори меѓу Македонија и Бугарија со поддршка на ЕУ. Ова го истакна шефот на хрватската дипломатија Гордан Грлиќ-Радман во интервју за МИА.
Шефот на хрватската дипломатија оценува дека сите услови се подготвени и оти очекуваат и подготвеност од Бугарија за да се најде заедничко решение.
– Сите прашања што ќе се отворат подоцна можат да се решваат и паралелено. Мислам дека е многу важно сега да се почне со пристапни преговори со цел да се испрати важна порака на земјите од Западен Балкан – а тоа е дека ЕУ е подготвена да се вклучи, оти Западен Балкан е дел од европскиот простор, дека е важен геополитички и геостратешки простор – подвлече Грлиќ-Радман.
Грлиќ-Радман, кој учествуваше на Преспа форумот за дијалог во Охрид, вели дека е многу важно да се придонесува за мирот и стабилноста и да се види остварување на желбата на Македонија која е определена за членство во ЕУ и оти, вели, дека сме заедно во европското семејство.
– Француското претседателство секако е важно. Франција сака да покаже дека, а таа тоа и е, дека е водечка држава во земјите-членки на ЕУ. И Франција и Германија се големи и одговорни земји. Францускиот претседател Макрон лани за време на посетата на Хрватска рече дека нему му е многу важен самитот за Западен Балкан и дека секако е заинтересиран и оти Франција силно ќе поддржи отворање преговори со Северна Македонија и со Албанија, бидејќи тоа е и во интерес и за безбедноста на Европската Унија – нагласи Радман во интервјуто за МИА.
Целото интервју, заедно со видео-материјалот ќе биде објавено утре.
