Скокот на Македонија за 24 места на индексот за перцепција на корупцијата на „Транспаренси интернешнел“ покажува дека има напредок во борбата против корупцијата, но мора да се биде искрен и да се признае дека во овие извештаи се забележуваат и определени дејства или активности што треба да ги преземе државата, особено кога зборуваме за надлежноста на Јавното обвинителство, оценува државниот јавен обвинител Љубомир Јовески.
– Не е занемарлив податокот за скокот од 24 места во однос на индексот за перцепција на корупцијата. Тука само да дополнам дека и во извештајот на Стејт департментот на САД се забележува зголемената борба против организираниот криминал и корупцијата, а исто така тоа е заклучокот и во извештајот на Европската Унија. Ако се имаат предвид овие податоци, овие оцени во овие извештаи, ќе се види дека има напредок во борбата против корупцијата и организираниот криминал во државава, но мора да се биде искрен и да се признае дека во овие извештаи се забележуваат и определени дејства или активности што треба да ги преземе државата, особено кога зборуваме за надлежноста на Јавното обвинителство – вели Јовески во интервју за „Радио Слободна Европа“.
Тој посочува дека повеќепати истакнал дека за разлика од поранешниот период, сега во Јавното обвинителство има отворени предмети за носители на актуелната власт.
– Би спомнал дека Обвинителството има отворено предмет за висок функционер во Владата, има за државен секретар во едно од министерствата, потоа има за обвинители, судии и, според тоа, моја оцена е дека Обвинителството не постапува селективно, туку се држи до рамките на законот и неселективната правда. Од друга страна, исто така, сакам да истакнам дека Обвинителството има отворено повеќе предмети по службена должност или, како што вели јавноста, по допрен глас – додава јавниот обвинител Јовески.
