Регулаторната комисија за енергетика, водни услуги и услуги за управување со комунален отпад (РКЕ) донесе одлука за намалување на малопродажните цени на нафтените деривати во просек за 1,85 проценти.
Новите цени ќе важат од 6 октомври 2026 година од 00:01 часот.
Според одлуката на РКЕ, најголемо намалување има кај дизел горивото, кое поевтинува за 3 денари по литар. ЕУРОДИЗЕЛ БС (Д-Е V) од полноќ ќе се продава по максимална цена од 97 денари за литар.
Бензините поевтинуваат за 1,50 денар по литар. Новата максимална цена на ЕУРОСУПЕР БС-95 ќе изнесува 98,50 денари за литар, додека ЕУРОСУПЕР БС-98 ќе чини 100,50 денари за литар.
Екстра лесното масло за домаќинство (ЕЛ-1) поевтинува за 3 денари и ќе се продава по максимална цена од 108,50 денари за литар.
Цената на мазутот М-1 НС се намалува за 0,285 денари по килограм, а новата максимална цена ќе изнесува 49,597 денари за килограм.
Од РКЕ информираат дека намалувањето е резултат на пониските референтни цени на нафтените деривати на светскиот пазар. Во споредба со претходната пресметка, цените на бензините се намалени за 2,885 проценти, на дизелот за 4,770 проценти, на екстра лесното масло за 4,384 проценти, а на мазутот за 1,807 проценти.
Во пресметката е земена предвид и промената на курсот на денарот во однос на доларот, кој во изминатиот период е повисок за 0,9101 проценти.
РКЕ посочува дека во новата одлука е применета владината мерка за намален ДДВ за ЕУРОДИЗЕЛ (Д-Е V) од 10 проценти, како и намалениот износ на акцизата од 4 денари по литар кај бензините ЕУРОСУПЕР БС-95 и ЕУРОСУПЕР БС-98 и кај дизелот.
Од Комисијата нагласуваат дека станува збор за максимални цени, а трговците можат да ги формираат малопродажните цени и под утврдените највисоки износи.
