Новата книга поезија на Лорета Георгиевска-Јаковлева, насловена „Даночен број на страста“, ќе биде промовирана денеска, во 19 часот, во ЈУ Културно-информативен центар (КИЦ) – Скопје. Книгата е најавена како нов творечки исчекор за авторката. Промотор на делото е Ана Мартиноска, делови од книгата ќе интерпретира актерката Ирена Ристиќ, а видеото и музиката се на „Лазар-арт студио“.
Стихозбирката „Даночен број на страста“ претставува комплексен и многуслоен проект на современата поетска мисла, каде што индивидуалната интимност, љубовта, моралот и интелектуалната слобода се разгледуваат преку различни филозофски, историски и уметнички референции. Збирката не е само зборовен експеримент; таа функционира како систем на огледала каде што секоја песна ги рефлектира и преиспитува вистината, етиката, страста и познанието.
Лорета Георгиевска-Јаковлева е истакната книжевна теоретичарка, критичарка со широк научноистражувачки интерес: компаративна литература, македонска литература, теорија на литературата, културолошки студии, родови студии. Таа е автор на десетина книги и голем број книжевни студии, реферати, статии. Работи како редовен професор/научен советник во Институтот за македонска литература при УКИМ.
