Активното население во Македонија во второто тримесечје од 2026 година изнесувало 798.718 лица, што е зголемување од 0,8 проценти во однос на истиот период минатата година. Од нив, 708.698 лица биле вработени, додека 90.020 лица биле невработени, покажуваат податоците на Државниот завод за статистика, пренесе МИА.
Стапката на активност изнесувала 52,5 проценти, стапката на вработеност 46,6 проценти, а стапката на невработеност 11,3 проценти. Во споредба со второто тримесечје од 2025 година, бројот на вработени лица е зголемен за 1 процент, додека бројот на невработени е намален за 1,5 проценти.
Од вкупниот број невработени, 63,6 проценти се мажи, а 36,4 проценти се жени. Кај вработените, мажите учествуваат со 57,7 проценти, додека жените со 42,3 проценти.
Истовремено, во второто тримесечје од 2026 година се регистрирани 101.022 неформално вработени лица, што претставува зголемување од 7,2 проценти во однос на претходното тримесечје.
Од ДЗС посочуваат дека најголем дел од растот на неформалната вработеност се должи на зголемениот број лица ангажирани во земјоделството, шумарството и рибарството. Во овие дејности биле евидентирани 51.487 неформално вработени, односно 51 процент од вкупниот број.
Дополнителни 17,2 проценти од неформално вработените биле ангажирани во градежништвото. Според ДЗС, ваквата структура покажува дека сезонските активности во земјоделството и градежништвото имаат значително влијание врз кварталните промени на неформалната вработеност.
