ТЕНИС
- Покрај подобрените опции за сместување и обновеното кулинарско искуство во рестораните на стадионот, играчите ќе имаат корист од новите услуги за закрепнување (хипербарична комора, соба за криотерапија…), првпат годинава играчите ќе користат уреди за собирање биометриски податоци…
Подобрени услуги за тенисери и иновации во перформансите, одбележување легендарни шампиони, поамбициозна Недела на отворање и широк спектар на настани и внатре и надвор од стадионот се дел од новитетите за гранслем-турнирот Ролан Гарос годинава, пишува на официјалната интернет-страница на турнирот. Првпат годинава, на играчите (закажани се 899 меча) на Ролан Гарос ќе им биде дозволено да користат уреди за собирање биометриски податоци. Оваа пилот-програма ќе им обезбеди вредни сознанија за нивните физички перформанси и за закрепнување во текот на турнирот. Пробната програма, со користење уреди наведени во регистарот „Тенис за анализа на играчи“ одобрен од Светскиот тенис, ќе се имплементира и на гранслем-турнирите Вимблдон и САД опен.
Покрај подобрените опции за сместување и обновеното кулинарско искуство во рестораните на стадионот, играчите ќе имаат корист од новите услуги за закрепнување на теренот „Филип-Шатрие“, како и во Францускиот национален тренинг-центар, каде што ќе има нова хипербарична комора дизајнирана да го оптимизира внесувањето кислород и да го забрза закрепнувањето на мускулите, заедно со соба за криотерапија, а првпат во Националниот тренинг-центар ќе има и два терена, обезбедувајќи оптимални услови за тренинг, особено во случај на предизвикувачки временски услови.
– Сакаме да им обезбедиме на играчите најдобри можни услови и ги слушаме нивните барања. Добивме пофалби за приватноста што им ја нудиме на играчите и правиме сѐ што можеме секоја година за да ги прошириме наменските области. Играчите треба да можат да се подготвуваат за своите натпревари во што е можно помирна средина. Целта е да се подобрат перформансите на играчите – изјави на прес-конференција Амели Морезмо, директорка на тој гранслем-турнир. Н.М.
