Иран во моментов нема планови за нова рунда преговори со Соединетите Американски Држави, изјави портпаролот на Министерството за надворешни работи Есмаил Багаи, пренесува Асошиејтед прес.
– Немаме планови за следната рунда преговори – изјави Багаи на прес-конференција во Техеран, додавајќи дека не е донесена никаква одлука по ова прашање.
Изјавата доаѓа во пресрет на истекот на прекинот на огнот меѓу Иран, САД и Израел, кој стапи во сила на 8 април, а чија иднина засега останува неизвесна.
Во меѓувреме, американскиот претседател Доналд Трамп најави дека американски претставници ќе отпатуваат во Исламабад за нови разговори, и покрај тоа што претходната рунда преговори заврши без договор.
Како што јавува АП, несогласувањата меѓу двете страни остануваат длабоки, особено околу прашањата поврзани со Ормускиот Теснец и иранската нуклеарна програма.
