Рускиот претседател Владимир Путин предложил повеќе опции за посредување во конфликтот со Иран, а дел од тие предлози и натаму се на маса, соопшти Кремљ.
Портпаролот на Кремљ, Дмитриј Песков, изјави дека уште пред ескалацијата на воените дејства рускиот претседател предложил иницијативи за посредување со цел намалување на тензиите, пренесе „Ал Арабија“.
– Од самиот почеток на оваа ситуација, дури и пред да започне воената фаза, претседателот Путин предложи различни опции за посредување и добри услуги што би можеле да помогнат во намалување на тензиите. Многу од тие предлози сè уште се на маса – изјави Песков.
Тој додаде дека Русија е подготвена да помогне во рамките на своите можности, но нагласи дека за тоа се потребни договори и разбирање од повеќе страни.
Изјавата доаѓа еден ден откако Путин разговарал телефонски со американскиот претседател Доналд Трамп. Според Кремљ, за време на разговорот биле споделени предлози насочени кон побрзо завршување на војната во Иран, но Песков не откри детали за нивната содржина.
Трамп, пак, изјави дека Путин „сака да помогне“ во конфликтот со Иран, но додаде дека му порачал најпрво да се фокусира на завршување на војната меѓу Русија и Украина.
Русија, која има договор за стратешко партнерство со Иран, ја осуди војната што САД и Израел ја започнаа против Исламската Република на 28 февруари. Во исто време, како голем извозник на енергија, Москва има корист од порастот на цените на нафтата поради конфликтот.
Пратеникот на Трамп, Стив Виткоф, за време на викендот изјави дека побарал од Русија да не му доставува разузнавачки информации на Иран, по извештајот на The Washington Post дека Москва му обезбедува на Техеран податоци за таргетирање со цел напади врз американските сили на Блискиот Исток.
Песков одби да ги коментира овие тврдења, нагласувајќи дека Русија не дава јавни реакции на вакви медиумски извештаи.
