Годишен отчет на претседателот на САД пред Конгресот
- Претседателот Трамп нагласи дека ја забавил инфлацијата, ја довел берзата до рекордни височини, потпишал големи даночни намалувања и ги намалил цените на лековите, во рекордно долгиот говор што траеше еден час и четириесет и осум минути, со најголем фокус врз економијата
- Трамп повторно тврдеше дека „завршил“ осум војни и едвај ја спомна Украина, и покрај тоа што во вторникот беше одбележана четвртата годишнина од руско-украинскиот воен судир. Тој не се осврна на Кина, главниот економски ривал на Америка, или на Гренланд, данска територија што се закани дека ќе ја преземе. Американскиот претседател, исто така, не понуди јасност во врска со неговите планови за Иран по повод загриженоста дека САД се приближуваат до воен конфликт со Исламската Република Иран
Воведувањето на „златната доба на Америка“ беше истакнато од страна на американскиот претседател Доналд Трамп во неговото обраќање за состојбата на нацијата во Конгресот, во кое настојуваше да проектира успех пред среднорочните избори во САД во ноември, пренесуваат светските медиуми. Трамп нагласи дека ја забавил инфлацијата, ја довел берзата до рекордни височини, потпишал големи даночни намалувања и ги намалил цените на лековите, во рекордно долгиот говор што траеше еден час и четириесет и осум минути (го собори сопствениот рекорд поставен минатата година), со најголем фокус врз економијата. Најголем дел од говорот се однесуваше на домашните политики на САД.
– Нашата нација се врати – поголема, подобра, побогата и посилна од кога било досега – рече Трамп откако излезе на сцената со овации од колегите републиканци во Конгресот, со десетици празни места наменети за демократите.
Обраќање во чувствителен момент
Годишниот говор пред Конгресот дојде во чувствителен момент во претседателствувањето на Трамп, бидејќи кај мнозинството Американци се зголемува вознемиреноста околу тензиите со Иран и тарифната политика (откако Врховниот суд на САД ги укина поголемиот дел од увозните даноци на претседателот), како што покажуваат испитувањата на јавното мислење,
Највисокиот суд на САД минатата недела ги поништи царинските политики на Трамп спроведени според законот за вонредна состојба, без одобрение од Конгресот. Американскиот претседател, во присуство на четири судии на Врховниот суд за време на неговото обраќање, ја оквалификува ваквата одлука како несреќна и разочарувачка.
Во поголемиот дел од говорот, Трамп главно се држеше до своите подготвени забелешки, избегнувајќи отстапувања. Во еден момент, тој се пофали со сета „победа“ што ја доживеаја САД за време на неговиот мандат, пред да ги претстави членовите на машката репрезентација на САД во хокеј на мраз, кои влегоа во комората носејќи ги златните медали што ги освоија на Зимските олимписки игри во неделата.
Пофалби за економските и мировните успеси
Иако Трамп рече дека инфлацијата „опаѓа“, цените за намирниците, домувањето, осигурувањето и на комуналните услуги остануваат значително повисоки отколку пред неколку години. Американскиот претседател го нападна Врховниот суд по одлуката за тарифите донесена во петокот. Тој ја нарече пресудата „несреќна“, но тврдеше дека таа на крајот ќе има мало влијание врз неговата трговска политика. Трамп не зборуваше за вештачката интелигенција, во време кога технологијата ги поттикнува и берзата и растечката загриженост кај работниците. Тој, исто така, потроши малку време на надворешната политика, иако голем дел од својата енергија на функцијата ја фокусираше на прашања во странство.
Трамп повторно тврдеше дека „завршил“ осум војни и едвај ја спомна Украина, и покрај тоа што во вторникот беше одбележана четвртата годишнина од руско-украинскиот воен судир. Тој не се осврна на Кина, главниот економски ривал на Америка, или на Гренланд, данска територија што се закани дека ќе ја преземе. Американскиот претседател, исто така, не понуди јасност во врска со неговите планови за Иран по повод загриженоста дека САД се приближуваат до воен конфликт со Исламската Република Иран.
– Ние сме во преговори со нив. Моето претпочитање е овој проблем да се реши преку дипломатија. Тие сакаат да склучат договор, но ние не ги слушнавме зборовите: никогаш нема да имаме нуклеарно оружје. Едно е сигурно, никогаш нема да дозволам светскиот спонзор број еден на теророт, каков што се тие, да има нуклеарно оружје – кажа Трамп.
Критики кон демократите
Во однос на прашањето за имиграцијата, претседателот Трамп ја повтори истата реторика што ја анимираше неговата изборна кампања во 2024 година, тврдејќи дека недокументираните мигранти се одговорни за бранот насилен криминал.
– Треба да се срамите – им рече тој на демократите, бидејќи одбија да го финансираат Министерството за домашна безбедност, освен ако не се преземат мерки за спречување на агресивните тактики на агентите за имиграција.
Анкетите покажуваат дека мнозинството Американци сметаат оти акциите на надлежните служби за справување со мигрантите отишле предалеку, откако двајца американски државјани беа застрелани од федерални агенти во Минеаполис.
Трамп, кој со години лажно тврдеше дека изборниот фалсификат во САД е неконтролиран, ги нападна и демократите затоа што не го поддржуваат барањето за идентификација на гласачите.
Демократите тврдат дека законодавството поддржано од републиканците ќе наметне непотребни оптоварувања на гласачите и ќе го потисне одзивот.
Дел од демократите го изразија своето незадоволство во одредени моменти за време на говорот, но во голема мера избегнаа целосно мешање во забелешките на претседателот. Р.С.
