Иранскиот претседател Масуд Пезешкијан денеска изјави дека Иран сака мир, но нема да се подложи на притисок и нема да ја запре својата нуклеарна програма, пренесуваат иранските државни медиуми.
Ова доаѓа откако американскиот претседател Доналд Трамп претходно рече дека Иран прашал дали САД може да ги отстранат санкциите против земјата.
– Иран прашува дали санкциите може да бидат укинати. Иран е под многу тешки американски санкции и тоа им отежнува да ги прават работите што сакаат да ги прават. Јас сум склон да размислам за тоа прашање, ќе видиме што ќе се случи, но јас сум склон да размислам – изјави Трамп за новинарите во Белата куќа.
Мисијата на Иран во седиштето на ОН во Њујорк засега не ја коментираше темата.
Врховниот лидер на Иран, Али Хаменеи, во понеделникот изјави дека соработката меѓу Иран и САД не е можна доколку Вашингтон продолжи да го поддржува Израел, да одржува воени бази и да се меша на Блискиот Исток.
По започнувањето на неговиот втор претседателски мандат во јануари, Трамп се врати на кампањата за „максимален притисок“ врз Иран, која вклучува напори да се спречи Иран да развие нуклеарно оружје. Во јуни, САД бомбардираа ирански нуклеарни постројки.
Двете земји одржаа пет круга преговори за ова прашање, кои беа прекинати од 12-дневната војна меѓу Иран и Израел. За време на преговорите меѓу Техеран и Вашингтон не беше постигната согласност за неколку прашања, меѓу кои и збогатувањето на ураниум, кое западните сили сакаат да го сведат на минимум за да го избегнат ризикот од вооружување на Техеран. Иран ги отфрла тврдењата дека се обидува да развие нуклеарно оружје.
